Vuohču Sámiid Searvvi miellahtut ráhkkanišgohtet 50-jagi ávvudeapmái.
Vuohču Sámiid Searvi doalai jahkečoahkkima duorastaga borgemánu 20. beaivvi, Kulturgalleriija Magga-Hettas. Searvvi njuolggadusaid mielde jahkečoahkkima galggašii doallat maŋemustá álgán doaibmabaji njukčamánus, muhto koronadili dihte jahkečoahkkin dollojuvvui easka dál.
Stivra
Jahkečoahkkimis válljejuvvon stivrras jotket árabut doaibman lahtut uhca rievdadusaiguin. Ságadoallin joatká Unna-Maari Pulska ja várreságadoallin Elli-Marja Hetta. Čálli-ruhtadoalli doaimmas joatká Leena Mattanen. Stivrra aitosaš lahttun jotket Mika Keskitalo, Juha-Petteri Alakorva, Jarmo Magga, Inga Koivisto ja Juha Sieppi. Stivrra várrelahttun válljejuvvojedje Jenni-Emilia Pehkonen, Anu Virtanen, Antti Äärelä ja ođđa várrelahttun álgá Tuomas Haapaporras.
Áššit
Njuolggadusain meroštallojuvvon áššiid lassin jahkečoahkkimis ságastalle áigeguovdilis áššiin, degomat Vuohču badjeskuvlla heaittihanplánain ja Vuohču guovllus lassáneaddji golleroggamis. Čoahkkimis maid vuođđuduvvojedje Tankajohka-bargojoavku ja ávvodoaibmagoddi. Tankajohka-bargojoavkku ulbmil lea suokkardallat vugiid Tankajoga rekonstrueremii. Ávvodoaibmagoddi vuođđuduvvui plánet searvvi ávvojagi, mii lea boahtte jagi, 2021:s, go searvi deavdá 50 jagi. 1971:s vuođđuduvvon Vuohču Sámiid Searvvi ulbmil lea doarjut ja ovddidit sámegiela ja -kultuvrra Vuohču guovllus.
