Ráđđehus lea ložžen koronagáržžidemiid, ja dat addá doaivaga Guovdageainnu valáštallansearvái beassat lágidit Ávvir Cup čiekčamiid.
Guovdageainnu valáštallansearvvi jođiheaddji Svein Ole Sandvik oaidná vejolašvuođa lágidit Ávvir Cup čiekčamiid maŋŋá go ráđđehus dieđihii ahte geahpidit korona doaibmabijuid.
– Vaikke eai leat rahpan vejolašvuođa lágidit turneringačiekčamiid, de mii goit liikká ráhkkanišgoahtit dasa, go njuolggadusa sáhttet fáhkka fas ložžet, dadjá Sandvik.
Ođđa vejolašvuohta
Ráđđehus lea rahpan earret eará searvevaláštallama daidda geat leat badjel 20-jahkásaččat. Dát guoská dušše hárjehallamii, iige gilvvohallan vejolašvuhtii. Guovdageainnu valáštallansearvvi jođiheaddji Svein Ole Sandvik lohká sii ledje mearridan ahte eai lágit Ávvir Cup čiekčamiid.
– Mearrádus lei ahte eat áiggo lágidit Ávvir Cup čiekčamiid, dasto digaštalaimet lágidit turneringa 19-jahkásaččaide. Muhto eai mis leat nu olu čiekčit dien agis, nu ahte mearrideimmet ahte eat daga dan. Seammás lei gehččiid njuolggadus. Midjiide ii livčče áktánas dienas lágidit dakkár turneringa, muhto baicca táhpa, dadjá son ja joatká:
– Jus boahtá vejolašvuohta ahte beassat lágidit Ávvir Cup turneringa, de dieđus dahkat dan, dadjá son.
Ávvur Cup
Ávvir Cup lea ovddeš Nilut Cup spábbačiekčanlágideapmi. Turneringa láve lágiduvvot skábmamánu gaskamuttus. Diibmá lágidii Guovdageainnu valáštallansearvi dán vuosttaš gearddi, maŋŋá go Nilut Joavku eai šat sihtan lágidit turneringa.
Loga maid: Stuora beroštupmi searvat Ávvir Cupii
Spábbačiekčamii dárbu
Sandvik, guhte lea maid Guovdageainnu A-joavkku váldohárjeheaddji, lohká leat dehálažžan leat gearggus go spábbačiekčit leat leamaš nu guhká fálaldaga haga, mii lea dagahan ahte čiekčit leat jávkan. Son jáhkká ahte turneringa sáhttá fas boktit čiekčanmiela.
– Oaidnit dáppe ahte spábbačiekčán lea oalát nohkan gáržžidemiid geažil. Sii eai leat guhkes áigái beassan hárjehallat ja jáhkán spábbačiekčangoikku stuorisin, dadjá son.
Oanehis áiggis son áigu čohkket searaid
– Ieš dat plána gal lea gárvvis mo lágidit turneringa, muhto dás lea sáhka olmmošlaš návccain. Daid beliid ferten oažžut čoahkkái dál, muđui gal eai leat makkárge eará hástalusat lágidit ovtta turneringa, dadjá Svein Ole Sandvik ja joatká:
– Dál lea dehálaš oažžut dán dieđu olggos nu árrat go vejolaš čikčiide, vai dihtet dása ráhkkanišgoahtit, loahpaha son.
Ávvir gearggus
Per Christian Biti guhte doaimmaha streamema Ávvira bealis, muitala Ávvir lea gearggus streamet jus gáržžideamit ložžet vel eanet.
– Heive hui bures, dadjá Per Christian Biti.
Loga maiddái: Ávvir Cup sáhtát čuovvut vaikko gos máilmmis
