Molleš Piera, Johan Anders Bæhr ja Laila Totsås leat ráhkkaneamen ihttá doaluide Vuolit-Molležis. Sii sáhttet muitalit ahte odne leamaš Iešjávrris lagabui 15 lieggagráda, vuodjagoalki jávrri alde ja leat aiddo goddán 5-kilosaš dápmoha.
Molleš Piera, Johan Anders Bæhr ja Laila Totsås leat ráhkkaneamen ihttá doaluide Vuolit-Molležis. Sii sáhttet muitalit ahte odne leamaš Iešjávrris lagabui 15 lieggagráda, vuodjagoalki jávrri alde ja leat aiddo goddán 5-kilosaš dápmoha.
Dasa lassin leat dát golbmasat ráhkadan mannan ija ođđa luođi Giđđaidja doaluide, maid Molleš Piera lohká gelddolažžan beassat ihttin gussiide álmmuhit.
Válddii bottu
Ihttin lágida njealját háve Vuolit-Molleža duottarstohpu Giđđa idja konseartta eahkedis Vuolit-Molleža duottarstobu šilljus ja oaggungilvvuid Iešjávrre alde sotnabeaivvi. Molleš Pieras, dahje Per Edvard Johnsen muitala leamaš hušas maŋimuš beivviid, go Ávvir su riŋgestii. Dál lei goittot váldán smávva bottu ja dolvon iežas artistta gussiid Iešjávrái guollebivdui.
Ođđa borramušlisttu
Muđui muitala son iežas Duottarstobu oađđinsajiid várren áigá ja muitala buot 50 seaŋgasaji leat anus olles vahkkuloahppa.
– Dat mii lea ođas dán jagi, lea ahte lean ordnen nu gohččoduvvon “viđa mállása” borramušlisttu árraeahkeda odne, mas fállojuvvo erenomáš duottar herskot báikkálaš málesdorvviin, gos maiddái guoimmuheaba Laila Totsås guovttos Johan Anders Bæhrain, muitala Molleš-Piera.
Dán jagáš konseartta artisttat leat troanddinlaš Laila Totsås, báikkálaš juoigi Johan Anders Bæhr, gii leamaš mielde juohke jagi ja báikkálaš joavku Nostalgiija Gánddat, mas čuojahit Terje Tretnes, Halvdan Nedrejord ja Tor Sæther.
– Laila lea čeahpes lávlu, sus lea alla oahppu musihkasuorggis, geas leat ollu iežas lávlagat dárogillii ja eaŋgalašgillii ja lea maiddái álmmuhan skearruid. Dat mii lea erenomaš, lea ahte son leamaš oktii mielde juoiganoperas loginár jagi áigi ja finai maiddái Molležis dalle. Dalle go dáppe lei dát juoiganopera, de mun gullen man čeahpi son lea. Danin háliidedjen bovdet su ja son mieđai seammás, rámida lágideaddji.
Illuda konsertii
Ieš Laila Totsås vuordá gelddolaččat beassat čuojahit iežas vuosttaš duottarkonsearttas, muhto justa dál leamaš veahkkin rundimin bajás dan stuorra dápmoha, mii su mielas lei issoras somá.
– Dat lei duođaid somá ja sáhttán lieggasit ávžžuhit olbmuid boahttit deike vahkkuloahppa oaggungilvvuide sotnabeaivvi. Jáhkkán maiddái šaddat fiinna konseartta ihttin eahkedis, go lea nu erenomáš fiinnis beassat čuojahit luonddus ja vuorddán iluin lávlut giđđaijas, dadjá Totsås Ávvirii.
Doalut álget ihttin
Vuolit-Molleš doalut ihttin álget diibmu 17:00 ja bistet golmma rádjai idjii. Oaggungilvvut sotnabeaivvi álget diibmu 13:00 ja bistet gitta diibmu 16:00 rádjai, gos lea váldovuoitu 10.000 ruvnnu jus fal gottát losimus guoli ja vuosttaš guolli bálkkašuvvo 1000 ruvnnuin.
Muđui lea mánáide iežas oaggungilvu, mas lohpidit fiinna bálkkašumiid. Dasalassin lágiduvvo rutnebovrengilvu sihke nissoniidda ja albmáide, muhto eai leat vel álmmuhan maid jođáneamos bovrejeaddji vuoitá goappátge luohkkás. Dasa lassin lea borramuš ja juhkosiid vuovdin báikkis.
Badjánan beroštupmi
Beroštupmi Vuolit-Molleža doaluide lea lassánan jagis jahkái. Diibmá ledje badjelaš 350 olbmo fitnan eahketdoaluin ja oaggungilvvuin váile 200 olbmo, gos 135 olbmo serve oaggungilvui. Son vuordá seamma ollu olbmuid dán jagi maiddái ja lohká dálkkis ollu dadjamuš.
– Lea dehálaš ahte lea fiinna dálki, ahte olbmot arvet vuolgit tuvrii. Justa dál gal orro ahte šaddá fiinna dálki olles vahkkulohppii, muhto suddada dieđus de gal oalle ollu, muitala son.
