-Almmuhus-
-Almmuhus-
KULTUVRA Ráhkka­neame Skábma­govat álgo­álbmogiid filbma­festiválii

Ráhkka­neame Skábma­govat álgo­álbmogiid filbma­festiválii

-

-

Nu go skábmage olle davás juohke jagi, de maiddai Skábmagovat álgoálbmogiid filbmafestivála ordnejuvvo ođđajagemánus.

Dan dieđiheaba Skábmagovat buvttadeaddji Taru Arrela ja stivrra ságajođiheaddji Anne Kirste Aikio preassadieđáhusas. Soai dieđiheaba ahte koronavirus váikkuha maiddái Skábmagovat filbmafestivála ordnemii.

– Mii hálidit goitotge máilmmi dilis fuolatkeahttá fállat olbmuide viiddis filbmalávddi ja eará dáidda- ja kulturfáláldagaid nu go leamaš vierrun. Festivála teman jagis 2021 lea searvvušlašvuohta ja sámefilmmat – vajálkeahttá eará álgoálbmogiid filmmaid, dadjaba preassadieđáhusas.

Rahpan

Festivála álgá guovtte diimmu guhkosaš rahpansáddagiin, mii sáddejuvvo neahta bokte ođđajagemánu 29. beaivvi dainna lágiin, ahte buohkat sáhttet geahččat dan. Rahpandoaluin fállat máŋggabealat dáiddafálaldaga, mii sisttisdoallá earet eará oanehisfilmmaid, jearahallamiid, musihkka ja performansadáidaga.

Buot jagi 2021 festivála dáhpáhusaid plánemis váldit vuhtii pandemiadili ja dorvvolašvuođa.

– Mii čuovvut dárket virgeoapmahaččaid rávvagiid ja ráhkkanit koronadili vearráneapmái nu ahte plánet festivála ordnema maiddái ollásit digitála hámis. Goittotge juos pandemiijadilli ráffu ja dahká midjiide vejolažžan; de dalle čájehit muhtin filbmačájáhusaid Anáris guovllu olbmuide ja váldit dieđusge vuhtii dorvvolašvuođa. Leš dal festiválabuvttadeapmi ollásit neahtas dahje hybridahámis, de sávvat ahte juksat unnimusat fásta gussiid ja dán earenoamáš vejolašvuođa bokte maiddái ođđa geahččiid digitála festivála bokte.

Ulbmil fállat albmaláhkai Skábmagovat doaluid

Soai dadjaba preassadieđáhusas ahte vaikko eai vealttakeahttá sáhtege dán dilis ovttas čoahkkanit návddašit filmmaid davás, de goittotge geahččalit buoremus lági mielde bargat nu, ahte buohkat besset vásihit albma Skábmagovat filbmafestivála atmosfeara – vaikko vel gártatge dahkat sierranas ordnemiid. – Mii beaivádit festivála dieđuid ja ođđasiid neahttasiidduid, sosiála mediaid ja dieđáhusaid bokte.

-Almmuhus-