-Almmuhus-
-Almmuhus-
OĐĐASATRáhkkanan ledje golli vuoittit

Ráhkkanan ledje golli vuoittit

-

-

Guovdageainnu leairaduvvábáhččit ledje ráhkkanan golli vuoittit Norggameasttirgilvvuin Eidskogas mannan váhkoloahpa.

Guovdageainnu bivdo- ja guolástansearvi ledje vuolgán golli viežžat Norggameasttirgilvvuin leairaduvvábáhčimis. Muhto nu ii riekta šaddan.

Individuella gilvvus bođii čihččet saddjii, ja bronšša nagodedje joavkogilvvus.

 

Golli viežžat

– Mii gal leimmet vuolgán vuoittit golli Guovdageainnu ovddas. Ii mannan nu bures go leimmet vuordán, muhto leat duhtavaččat lihkká, muitala joavkku jođiheaddji, Svein Ole Sandvik Ávvirii.

 

Unnánaš mii earuha

Sandvik čilge ahte sin báhččit leat hui bures báhčán dán jagi, ja danin sis ledje maid dan mađe alla vuordámušat.

– Mis lea riikajoavkkus okta báhčči, nu ahte diđiimet jus visot manna bures, de lea buorre vejolašvuohta vuoitit sus, lohka Sandvik, ja čilge:

– Sus lei golli lummas, muhto ii deaivan 21. duvvá. Jus lei deaivat, de livččii Norgga measttir. Nie unnán lea mii sáhttá earuhit golli ja čihččet sajis, čilge son.

 

Mihttu lei golli

Nils Rune Eira lei okta sis geat ledje bronšejoavkkus. Son maid mieđiha ahte sii ledje vuolgan golli viežžat joavkogilvvus maid.

– Mii diđiimet dán jagi bohtosiid vuođul ahte mis lea buorre joavku, nu ahte golli maŋis leimmet, lohká son

 

Bures hárjehallan

Eira ii biehttal ahte sus sáhttá maid vejolašvuohta riikajovkkui beassat, ja lohká ge dat vuolgá man olu asttá vuoruhit hárjehalláma.

– Dán jagi lean hárjehallan bures, dieđan Ole Johan maid lea dan dahkan. Diehttelasat vuolgá das hui olu man olu beassá hárjehallat, jus riikajovkui galgá beassat, lohká son.

 

Ektodáhtolaš gilvvut

Dán jagi ii oktage váldán badjelasat lágidit Norggameasttir gilvvuid leairaduvvábáhčimis. Danne fertejedje searvvit eaktodáhtolaččat ieža lágidit iešguđetge oasi NM leairaduvvábáhčimis.

Lei Málatvuomi Bivdo- ja guolástansearvi geat lágidedje dan NM-oasi Eidskog báikkis, Hedemárkkus, ja Guovdageainnu bivdo- ja guolástansearvi lágidedje fas «pressbáhčiima», mii lei sin oassi NMii.

Guovdageainnu bivdo- ja guolástansearvvis ledje oktiibuot čieža báhčči NM gilvvuin mielde.

Bronšejoavkkus ledje mielde golmmas, Ole Johan Triumf, Nils Rune Eira ja Odd Mathis Hætta.

Leairaduvvá joavkubáhčin NM 2016

Golli: Lindesnes JFF

Geir Østrem 49

Alf Jr. Buksholt 49

Dag Østrem 48

Oktiibuot 146

 

Silba: Rennebu JFF 1

Endre Kosberg50

Johnny Meier49

Olav Nygård47

Oktiibuot 146

 

Bronše: Kautokeino JFF 2

Ole Johan Triumf 50

Nils Rune Eira 49

Odd Mathis Hætta 46

Oktiibuot 145

 

 

-Almmuhus-