-Almmuhus-
OĐĐASATRáhkkanan jus basiid šaddet riiddut ruovttuin

Ráhkkanan jus basiid šaddet riiddut ruovttuin

-

-

Kárášjoga Heahte- ja inseastaguovddážis leat ráhkkanan juovlabasiide, jus mihkkege čuožžila basiid gaskkas. Heahte- ja inseastaguovddáš lea rabas birra jándora, dan geažil jus heahtedilli fáhkka čuožžila. 

Heahte- ja inseastaguovddáš lea fálaldat nissonolbmuide, dievdoolbmuide ja mánáide geat vásihit fysalaš ja/dahje psyhkalaš veahkaválddálašvuohta lagas birrasis. Dat lea fálaldat jus lagas birrasis illastuvvo seksuálalaččat ja  seksuálalaš loavkidat nisson- ja dievdoolbmuid.

Dat lea maid fálaldat fuolahusolbmui gii galgá fuolahit máná, guoimmi dahje oapmahačča gii lea vásihan seksuálalaš illasteami lagas bearrašis.

Jus lea jugešvuohta ruovttus, de lea maid vejolaš váldit oktavuođa singuin. 

 

Gergosat váldit vuostá

Kárášjoga heahte-ja inseastaguovddáža sadjásaš, Ida Charlotte Kemi, muitala ahte sii leat ráhkkanan juovlabasiide, muhto eai dieđusge badjelmeare. 

 – Mii leat gávppašan ja diekkáriid, jus fáhkka heahtii čuožžila. Mii leat gergosat váldit vuostá jus dárbbahuvvo mihkke, lohká son. 

 

Jaskes ja ráfálaš juovllat


RÁHKKANAN: Kárášjoga heahte-ja inseastaguovddáža sadjásaš, Ida Charlotte Kemi muitala ahte sii leat ráhkkanan juovlabasiide, muhto eai dieđusge badjelmeare.
Priváhta govva

Kemi muitala ahte dá leat njealját juovllat go son bargá heahte- ja inseastaguovddážis Kárášjogas, ii ge loga iežas vásihan fáhkkaheahtedilii juovllaid áigge.

Son lohká ahte leat leamašan jaskes ja ráfálaš juovllat nu go son lea vásihan. 

 

Ávžžuha riŋget sidjiide

Heahte- ja inseastaguovddážii sáhttá boahtit okto dahje bearrašiin jus dat lea.

Kemi ávžžuha riŋget sidjiide jus dovdá ahte lea dilli mas ii hálit leat ja dárbbaša veahki dahje oadjebasvuođa. 

 

Geatnegasvuohta dieđihit

Go heahte- ja inseastaguovddážii boahtá, de lohká Kemi ahte sis lea rutiidna váldit oktavuođa nu go politiijain, mánáidsuodjalusain, SANKS:in, psykologain, dearvvašvuođabálvalusain ja nu ain.

 – Jus lea dakkár dilálašvuohta ahte dárbbaša dieđihit earáide ášši, de dieđusge mis lea geatnegasvuohta dieđihit. 

 

Hálidiit dan buot buoremusa olbmuide

Kemi lohká maid iežas jáhkkit ahte olbmot ballet veaháš riŋgemis sidjiide. Muhto dan ii loga dárbbašit, go sis lea dieđusge maid jávohisvuođageatnegasvuohta. 

 – Jus lea heahti, de ávžžuhit riŋget. Lea maid beare boahtit deike min lusa. Mii eat dieđusge vuolgge olbmuid ruovttuide, muhto jus lea dárbu, de sáhttit viežžat nu go politiijastašuvnnas dahje dearvvasvuođaguovddážis. Mii áigut váldit vuostá sin buoremus lági mielde, ja háliidit álot dan buoremusa olbmuide ja ahte dilli galgá leat buorre. 

 

Mánát maid sáhttet riŋget

Kemi lohká ahte lea buoret boahtit sin lusa, jus dovdá ahte dilálašvuohta lea dakkár ahte ii hálit das leat.

Sidjiide sáhttá riŋget vaikko gii, mánát, nissonolbmot ja dievdoolbmot. 

 

Jus lossa dilli lea, riŋge sidjiide

Jus don dovddat lossavuođa basiid áigge, dahje eará áiggiid maid, de lea vejolašvuohta váldit oktavuođa Heahte- ja inseastaguovddážiin. 

 – Lea buoret váldit minguin oktavuođa, go ruovttus čohkkát ja dovdat lossa dovddu. Jus dus lea lossat ja dovddat ahte dilálašvuohta lea lossat ruovttus, earenoamážit juovllaid áigge, de lea buoret váldit minguin oktavuođa vai dillii buorrána. 

Heahte- ja inseastaguovddážiin sáhttá maid váldit oktavuođa jus lea jugešvuohta ruovttus, earenoamážit basiid áiggi. 

 

Áddet ráđi ja bagadusa

Heahte- ja inseastaguovddáš fállá dutnje dahje du mánáide suodjalusa, doarjaga ja praktihkalaš veahki lossa dilis.

Sii áddet oktagaslaš ságastallama, ráđi ja bagadusa, ja jus attát mieđáhusa, de sáhttet veahkkin váldit oktavuođa almmolaš bálvalusapparáhtain, nu go advokáhtain, politiijain ja NAV:in ja ollu eará bálvalusaiguin.

Jus lea dárbu dulkomii, de ordnejit sii dan. 

 

Nuvttá fálaldat

Sin ulbmil lea addit veahki ja doarjaga sidjiide geat leat ja geat ain vásihit seksuálalaš boasttugeavaheami. Sii maid veahkehit sin oapmahaččaid. Visot fálaldagat maid sii fállet leat nuvttá. 

Kárášjoga Heahte- ja inseastaguovddáš lea ovttasráđiid Guovdageainnun. 

-Almmuhus-