Mánnodaga lea «váimmuid beaivi» dahje «Valentines-beaivi», ja mii heive buorebut go čuojahit ráhkisvuođa musihkaid ráhkkásii? Dahje dušše ieš guldalit daid.
Váimmuid beaivi lea juohke jagi guovvamánu 14.beaivvi, ja dalle lávejit soapmásat čájehit juogalágán beroštumi iežaset guoibmái dahje sutnje geasa leat liikostan.
Movt galgá ávvudit?
Movt de galggašii «váimmuid beaivvi» ávvudit? Lebbestit stuora duolji ommangáddái ja dollagáttis velohallat iežat «buolli ráhkisvuođain»? Soaitá gal šaddat beare «klišéa» dan dahkat. Dat ii daga maidege, dán beaivvi lea lohpi čájehit iežas ráhkisvuođa justte movt iežas mielas orro heiveme.
Gávppit fállet vaikko makkár skeaŋkkažiid dákkár beivviid oktavuođas, muhto dávjá lea beroštumi ulbmil deháleamos. Danne ii leat bággu viehkat rámbuvrii olles leahtuin vai olle oastilit liđiid ja šukuládaid.
Soaittát ieš fuobmát eará ládje čájehit beroštumi.
Jus it ieš čális lávlaga, de leat máŋga eará sámi artista bádden lávlagiid maid sáhtát čuojahit iežat ráhkkásii. Dahje dušše ieš guldalit jus háliidat suddadit iežat váimmu.
2016:s bivddii Ávvir lohkkiid evttohit mii lea sámi čábbámus ráhkisvuođalávlla, ja dalle bohte 17 evttohusa. Mii hástalit lohkkiid dán jagi maid evttohit čábbámus ráhkisvuođalávlaga. Sáddes iežat evttohusa: post@avvir.no dahje dieđu Ávvira Facebook- dahje Instagram-siiddu bokte.
Roy Arthur Olsen
