-Almmuhus-
OĐĐASAT– Ráhkis sámi álbmot!

– Ráhkis sámi álbmot!

-

-

Ávvudearvvuođat Sámi álbmotbeaivvi Sámedikki presideanttas Aili Keskitalos.

 

– Sámi Álbmotbeaivi lea duođas šaddan beaivi maid ávvudit, ja ávvudit mii gal. Miehtá Sámi ja vel dobbelii. Mu mátkkiin miehtá gos orrot sápmelaččat, oainnán ahte sámi giella ja kultuvra šaddet deháleabbon ja deháleabbon. Sámi giliin siseatnamis ja mearragáttiin, nuortan ja oarjin, davvin ja lulde. Ahte sámi giella ja kultuvra šaddet deháleabbon, oaidná bures Sámeálbmot beaivvi, go eanet ja eanet olbmot háliidit ávvudit dan giliin ja gávpogiin. Odne čájehit mii sámi rámisvuođa, ja mii ávvudit dan.

 

– Mu ođđajagisártnis hupmen mun ahte dát jahki šaddá sámi ofelaččaid jahkin. Danin heive ge bures muittuhit man dehálaččat sámi ofelaččat leat go mii dál beassat ávvudit dainna goargatvuođain nu go mii dahkat. Mii ávvudit giitevašvuođain iežamet ovddeš ofelaččaide, sidjiide geat deaivvadedje Troandimis 1917:s, sidjiide geat leat bisuhan ealli sámevuođa dáruiduhttima čađa, ja buolvvaide 70- ja 80-logus, geat ipmirdedje man dehálaš vuovdna lea ovtta álbmogii ja geat háste min čájehit sámi vuoiŋŋa.

 

– Ii unnit, de ávvudit mii daid ođđaáigásaš sámi ofelaččaid, geat gávdnojit juohke sajis. Dat leat sápmelaččat geat leat álggahan Sámi álbmotbeaivvi ávvudeami giliin mat leat garrasit dáruiduvvon, ja leat ofelaččat geat barget min gávpogiin sihkkarastindihte ahte maiddái dat sápmelaččat geat orrot doppe, galget beassat doaimmahit sámi giela ja kultuvrra, ja danin lean mun hui ilus go odne beasan vuolláičállit ovttasbargojulggaštusa gaskal Sámedikki ja Oslo suohkana. Dát ii livčče vejolaš áŋgiris bargguid haga maid Oslo sápmelaččat leat bargan.

 

– Sápmi, mii diehtit ahte mii bargat vuostebiekkas Stuoradikki ektui, mii juolluda unnit ja unnit ruđa sámi servodahkii. Muhto odne mii ávvudit ahte sámi čeavláivuohta lea nanus maiddái vuostegieđageavvama áiggi.

 

– Loahpas áiggun vel sáddet earenoamáš lihkusávaldagaid Girjás čerrui mii vuittii lágasteami Ruoŧa stáhta vuostá. Dát lea oassevuoitu mii sáhttá čájehuvvot leat stuora vuoitun sámi vuoigatvuođaid ektui Ruoŧa sámis. Dat boahtá leat stuora vuoitun sámi álbmogii.

Lihkku beivviin buohkaide!

 

-Almmuhus-