Álttá girjerádjosis leat doalut dán vahkku ja bovdejit olbmuid geahččat ja gullat ságastallamiid, ja oahppat rakeahta hukset.
Doalut leat heivehuvvon sidjiide geat beroštit meahcástallamis, historjjáin, smávvamánáid birra oahppat, rakeahttaberošteddjiide, musihkkaberošteddjiide ja maiddái dasa gii liiko kriminálafáddái.
Imašlaš muŋkka
Mánnodaga lea máilmmi girjjiid beaivi, ja de muitala Inger Krempig ođđa girjji birra «Villmarksbarna». Maiddái meahccegažaldagaid oažžu vástidit ja vuoitit vuoittuid.
Eahkedis diibmu 19 rájes čájehit čuovgagovaid ja girječálli Caroline Serck-Hanssen muitala su girjji birra.
Fáddá lea Petsjengga Trifon árbi, árbevierru mii čatná oktii nuortalašsámiid, ortodoksa ruoššaid, suopmelaččaid ja norgalaččaid rádjeguovllus. Gii lei Trifon ja makkár árbbi guđii dat imašlaš muŋkka.
Movt máná ipmirdit
Disdaga boahtá psykologa Christel Sundsfjord muitalit movt lea go mánát fuomášit iežaset dáhttu, ja makkár vejolašvuođat rahpasit sin máilmmi váikkuheapmái.
Movt dát ovdáneapmi doaibmá mánnái, ja movt hehttet ahte šaddá negatiiva áigi bearrašii ja movt gulahallat mánáin.
Rakeahta ráhkadit
Gaskavahkku lágiduvvo rakeahttabádji maid Finnmárkku dieđaguovddáža bargi Geir láidesta. Ráhkat iežat rakeahta ja eará girdi diŋggaid.
Bádji heive buoremusat mánáide geat leat 2.luohkás gitta 4.luohkálaččaide, ja lea dušše boahtit bádjái go ii dárbbat dieđihit ovdal.
Jørn Lier Horst boahtá
Duorastaga maŋŋelgaskabeaivvi lea Kulturskuvllas njurggonas ja fidjolkonsearta, ja leat Álttá kulturskuvlla oahppit geat čuojahit.
Maŋŋel konseartta, eahkedis, boahtá dovddus kriminálagirječálli Jørn Lier Horst muitalit su girjjiid birra. Son lea norgalaš girječálli ja lea ovdal bargan guorahallanjođiheaddjin politiijas, ja almmuhii su vuosttaš girjji 2004:s, «Nøkkelvitnet», mii lea kriminálaromána.
Gaskavahkku, duorastaga ja bearjadaga deaivvada Jørn Lier Horst 5.luohká ohppiiguin. Son muitala movt son geavaha iežas vásáhusaid go čállá dan áiggis go lei politiijadutki.
Govaiguin muitala áššiid birra maiguin son lea bargan, ja muitala movt politiijat čovde áššiid, ja movt son daid vásáhusaid geavaha fas iežas románain.
