Dán jagáš feastariemut Háštáin áigot čalmmustahttit davviálbmoga ja makkár hástalus árktalaš guovllu álbmogis leat šaddat gálvun maid ii sáhte ođasmahttit.
Davvi-Norgga feastariemuin lea čájálmas gos davviálbmot lea guovddážis, ja Davvi-Norgga dáiddamusea direktevra Jérémie McGowan ja Anchorage Musea direktevra Julie Decker galgaba čađahit dán jagáš čájáhusa man namma lea «Subsistence».
Čájáhus lea ráhkaduvvon árktalaš servvodagaid ja olbmuid birra, ja leat ságastallamat ja visuála muitalusat. Árktalaš servvodagain leat ođđaáigásaš báikkit ja kultuvrralaš lanjat mat leat guovddážis globála áicilvuhtii.
Ráhkadit saji ođđa jurdagiidda
Leat stuora vuordámušat Davvi-Norgga dáiddamusea ja Anchorage Museum ovttasbargui.
– Lea hui dehálaš midjiide heivehit dakkár internašunála čájáhusa mas lea sirkumpolára guovddážis. Feastariemut háliidit bovdet dakkár ovttasbargoprošeavttaide guovlulaš ja internašunála dáidda- ja kulturinstitušuvnnaiguin. Dainna lágiin ráhkada saji ođđa jurdagiidda ja ođđa prošeavttaide, muitala Maria Utsi, gii lea Davvi-Norgga Feastariemuid direktevra.
Davviálbmogiid jietna galgá gullot
Lagamus mánuid galgaba kuráhtorat ovttasbargat dáiddáriiguin, arkiteavttaiguin ja hábmejeddjiiguin, ja ráhkadit erenoamáš vásáhusa mas lea davviálbmogiid jietna. Čájáhus lea Galleriija Nord-Norges.
– Davvi-Norgga Dáiddamuseii lea dehálaš go bovdejuvvo searvat dakkár ovttasbargui. Mihttu lea ráhkadit čájáhusa mii ii leat dušše čájáhus, ja ahte eai leat dušše dievva dáidagat mat heaŋgájit seainnis, muitala Davvi-Norgga Dáiddamusea direktevra Jérémie McGowan.
Eai hálit romantiseret
– Davvin lea luondu ja biras dehálaččat eallimii, muhto mii eat hálit romantiseret olbmuid ceavzima. Čájáhusa ulbmil lea oažžut ovdan davviálbmoga jiena ja perspektiiva. Árktalaš guovllut lea bivnnuhat ja áigeguovdilat stuorapolitihkalaš mearrádusaide, ja dan dihte lea dehálaš oažžut ovdan olbmuid árvvoštallamis. Lea dehálaš ahte mii oahppat ieža muitalit min historjjá ja oahppat eaiggáduššat dan, čilge Anchorage Musea direktevra Julie Decker.
Čájáhus rahpá Davvi-Norgga Feastariemuid 2017.
