Walt Disney Animation Studios lea ovttasbargamin Sámeráđiin ja Sámi páramentáralaš Ráđiin (SPR) ráhkadit sámegiel veršuvnna Frozen 2 filmmas.
Disney filbmadahkkit leat leamašan Sámis geahčadeamen ja viežžamen inspirašuvnna ođđa filbmii. Dáppe leat ožžon veahki sámi bargojoavkkus gávdnat inspirašuvnna ođđa Frozen filbmii. Eambbo dieđut ovttasbarggu birra bohtet dán jagi.
Sámediggepresideanta Aili Keskitalo lea giitevaš ja ilolaš go Frozen 2 boahtá sámegillii
– Mii diehtit mis leat unnán filbmafálaldagat mánáide ja nuoraide, ja stuora Disney-produkšuvnnain lea stuora fápmu. Ii leat dábálaš ášši ahte dákkár produkšuvdna almmuhuvvo smávva gillii, nugo davvisámegillii. Danin lea dehálaš min mánáide ahte besset vásihit Disney-rollaid sámegillii, muitala Keskitalo.
Son muitala ahte das lea mearkkášupmi ja mánát oidnet ahte min gielas lea árvu, ja ahte earát maid oidnet dan seamma.
Frozen 2 filbmadahkkit leat mátkkoštan Islándii, Norgii ja Supmi ohcat eambbo dieđuid filbmii. Mii finaimet máŋgga sajis ja deaivvadeimmet ollu olbmuiguin, earret eará sámiiguin. Dát váikkuhii ja čuozai midjiide garrasit”, dadjá filmma produseanta Peter Del Vecho.
Fargga álggahuvvo casting-proseassa gávdnat jienaid davvisámi veršuvdnii Frozen 2 filmmas. Sámi veršuvdna almmuhuvvo juovlamánus seamma áiggi go eará davviriikkalaš veršuvnnat.
