-Almmuhus-
KULTUVRARáhkadan giellaspealu juovlaskeaŋkkan

Ráhkadan giellaspealu juovlaskeaŋkkan

-

-

Sámi giellaguovddáš Ruoŧas lea almmuhan sámi neahttaspealu mas leat juohkelágan sámi bealit dohkkehuvvon riektačállagiin.

Mánnodaga almmuhii Sámi giellaguovddáš New Amigosiin neahttaspealu masa dárbbašuvvo mobiilatelefovdna, neahttabreahtta dahje dihtor, ja speallan dahkko interneahta bokte.  

 

Juovlaskeaŋkan giellageavaheddjiide

Speallu lea lullisámegillii, ubmejensámegillii, julevsámegillii ja davvisámegillii.

– Mii addit iežamet giellageavaheddjiide dán neahttaspealu ovdagihtii juovlaskeaŋkan. Mánát ja rávisolbmot sáhttet speallat dán juovlaluomus, ja seammás sáhttet geavahit iežaset sámi giela, lohká Sámi giellaguovddáža bargojođiheaddji ja giellakonsuleanta Sylvia Sparrock preassadieđáhusas.

Ii ge geografiija leat hehttehussan. Lullisámi oahppi Lofsdalenis sáhttá speallat nuppiin ohppiin gii lea Gárasavvonis.

 

Heivehuvvon ollugiidda

New Amigos lea máilmmiviidosaš breahttaspeallu. Lea ovdal gávdnon lullisámegiel – dárogielhámis ja davvisámegiel ja dárogielhámis.

Sámi giellaguovddáš lea jorgalan spealu ruoŧagillii, julevsámegillii ja ubmisámegillii, ja heivehan davvi- ja lullisámegiela Ruoŧa beal Sápmái.

Speallu lea heivehuvvon mánáide geat máhttet ieža lohkat, nuoraide ja rávisolbmuide. Sáhttá okto speallat dahje sáhttá nuppiin speallat gii maid lea interneahta bokte spealli, čuožžu preassadieđáhusas.

 

Ohppet sániid ja cealkagiid

Spealus leat golbma máhttodási, sámegiel easkaálgiide, sidjiide geat háliidit buoridit sámegiela dahje sidjiide geat dušše háliidit speallat. Dat lea maid heivehuvvon leat suohtastallanspeallun.

– Neahttaspealuin oahppá ovddemusat daid deháleamos sániid ja cealkagiid. Spealus lea struktuvra mii sihkkárastá jođánis oahppama, ja geardduhanvuohki mii sihkkárastá bissovaš oahppama, lohká Lakki Patey New Amigo bealis.

 

Riggudahttá giellageavaheami

Speallu lea neahtas dál, muhto sáhttá maŋŋelaš viežžat appa man gávdná Appstores dahje Googleplayas.  2019s lea speallu nuvttá Sámi Giellaguovddáža bokte. Dan maŋŋel šaddá máksit spealu ovddas mánnosaččat dahje jahkásaččat.

– Lea somá go digitála neahttaspealut leat ovdánan sámi gielain. Dat riggudahttá ja ovdánahttá giellageavaheami, earenoamážit nuoraid gaskkas geat beaivválaččat geavahit boasttu teknihkaid, lohká Sámedikki giellalávdegotti jođiheaddji Lars-Miguel Utsi.

 

-Almmuhus-