– Filbma čájeha man dehálačča eaktodáhtolaččat leat Offroad Finnmárkui, dadjá hoavda.
Cuoŋománu 6. beaivvi čohkke Offroad Finnmark buot eaktodáhtolaččaid deaivvadeapmái UiT:i Álttás, gos maiddái šaddá eksklusiiva vuosttaščájálmas filmmas, sihkkelastin gilvvuid birra.
– Filbma čájehuvvo manne juste eaktodáhtolaččat seailluhit Offroad Finnmárkku. Mii sávvat sihke ođđa ja boares eaktodáhtolaččaid bures boahtin čájálmassii, dadjá Offroad Finnmark hoavda, Kjetil Johansen, preassadieđáhusas.
Diimmá gilvvus ledje máŋggas veahkkin čohkkeme daid buoremus vásáhusaid ja dál čájehat dan mii šattai boađusin 52 minuhtasaš filmmas. Filbmejeaddjit Jon Vidar Bull, Trond Anton Andersen, Anders Abrahamsen, Morten Broks, Rune Andreas Sjøstedt ja Ole Kristian Kivijärvi leat leamaš veahkkin.
Álgojurdda lei eará lágan filmma ráhkadit
Kjetil Johansen dadjá preassadieđáhusas ahte álgojurdda dán filmma ráhkadeamis lei áibbas eará. Ledje oaivvildan ráhkadit pilohta mii galgá čájehuvvot vai eambbogat servet sihkkelgilvvuide.
– Álgojurdda lei ráhkadit filmma mii muitala daid buori muitalusaid sihkkelrittas. Go geahčaimet loahppa bohtosa, bođii ovdan oalle čielgasit man dehálačča eaktodáhtolaččat leat. Mii ganjaldeimmet go dovddaheimmet giitevašvuođa eaktodáhtolaččaide, dadjá Johansen preassadieđáhusas.
