Áigot movttiidahttet su ain bargat ráfi guvlui.
Dán jagá Nobel ráfibálkkašumi oažžu Etiopia stádaministtar Abiy Ahmed, barggu dihte mas geahččala oažžut ráfi ránnjáriikkain gos leat guhkitáiggi soahtan.
– Muhtumiid mielas soaitá beare árrat addit sutnje bálkkašumi, muhto Nobellávdegoddi oaivvilda ahte dál heive hui bures go stádaministtar Abiy bargu ánssáša rámi ja movttiidahttima, dajai Nobellávdegotti jođiheaddji Berit Reiss-Andersen go almmuhii vuoiti, čállá NTB.
Ollu olahan
Ahmed, gii lea ovdal ON-soalddát leamaš, oažžu bálkkašumi go ránnjáriikkain Eritreain álggahii ráfišiehtadallamiid ovttatmano go lávki ámmáhii 2018:s.
– Son geavahii čuođi vuosttaš beaivvi ámmáhis heaittihit earenomášdilálašvuođa mii lei riikkas leamaš, ja addit árpmu máŋggaid duháhiid politihkalaš fáŋggaide, preassaásensuvrra heaittihit, legaliserii opposišuvnna, bijahii eret jođiheddjiid soahteveagas ja muđui geain ii leat luohttámuš ja maiddái attii eambbo váikkuhanfámu nissonolbmuide politihkas ja servodagas, muitala Berit Reiss-Andersen almmuheames.
Stuora vuoittut
Bálkkašumis geigejuvvo gollemedállja, diploma ja 9 miljovnna ruoŧa ruvnno.
Nobel bálkkašumit ásahuvvojedje jagi 1900:s fuomášeaddji ja dutki Alfred Nobel testameanta geažil, gos bođii ovdán movt galget hálddašit Nobela opmodaga. Dat leat vihtta bálkkašumi, namalassii ráfi, fysiologiija/medisiidna, fysihkka, kemiija ja girjjálašvuohta.
1901 rájes leat 590 bálkkašumi geigejuvvon 935 vuittiide. 52 vuitiin ledje nissonolbmot. Nuoramus gii lea ožžon dan lea Malala Yousfafzai, gii báhččui oaivái Talibanas go ii vuollánan doarrut nieiddaid rivttiid váldit oahpahusa ovddas. Boarráseamos ges 96 jagi.
