Ráfálaš Sápmi pride ráidovázzin

Olu olbmot ledje searvan otná Sápmi pride ráidovázziimi, maid Sápmi pride njunnošat, Lemet Ande Stueng ja Dávvet Bruun-Solbakk, ovttas Ruoŧa artisttain Mimi Märäkin láidestedje.

Stuora beroštupmi

Ledje olu olbmot searvan ráidovázziimi, ja dasa lassin maid olu biillat vudje ráiddu maŋis. Ledje maid muđui ge olu biillat jođus márkanis, ja dat vuhttui bures go ráidovázzin manai biilaluoddaráiggi, ja biillat šadde vuordit dassá ráidu manai meaddel.

Olu biilavuoddjit ledje vuolgán geahččat. Lei hui čoaskkis, ja arvečalmmit goiko.

(Ášši joatká gova vulobealde)

Ráidovázzima boarráseamos

Okta sis guhte váccii Sápmi Pride ráidovázzima, lei 80-jahkásaš Máret Stueng. Sus lei arvesuodji mainna soappui, ja arvedávgeleavga gieđas. Son lei ráiddu boarráseamos, ja lei ge báhcán 50 mehtera ráiddus sullii beallemátkis.

– In leat nu falli šat vázzit, muhto vázzit mun gal áiggun. Lemet Ande han, ja Dávvet, vázziba nu leahtus. Oslos ii lean goit ná leahttu, dadjá son go joavdá Ávvirbargi rádjai.

Olu rievdan

Sus lea bárdni ja mánáidmánná, guđet leat homofiilat. Su bárdni lea náitalan, ja su mánáid mánná lea ge Sápmi pride njunuš, Lemet Ande Stueng.

Máret Stueng muittaša ahte lea measta 40 jagi áigi go su bárdni bođii muitalit sutnje ahte liiko nuppiid dievdoolbmuide.

 – Munnje ii lean nu ártet, leimme isidin juo veahá vuohttán sus ahte lei earálágan. Mii lei ártet lei go dalle dadje buohkat ahte ii galgga muitalit dan birra, in galgan hubmát, diktit orrut jávohaga. Ja dál leat mii dáppe, Guovdageainnus, ráidovázzimis bonju sámiid doarjumis. Gal dat lea olu rievdan dan rájes, lohká Stueng.

(Ášši joatká gova vuolobealde)

Arctic Grafitti

Diehtosiidda olggobealde lei maid Arctic grafitti, Linda Aslaksen bokte, ráhkadeame dáidaga máid Guovdageidnui galget skeŋket. Ledje guokte ceakko njealječiegat kássa, masá birra cirgguhii ivnni.

Geahča Govvaráiddu dáppe!

Govven: Kari Lisbeth Hermansen