Saemien Sijte museadirektevra jáhkká sin guhkit áigge plána hukset ođđa vistti ollašuvvot, muhto easka maŋit jagi.
Saemien Sijte museadirektevra jáhkká sin guhkit áigge plána hukset ođđa vistti ollašuvvot, muhto easka maŋit jagi.
Saemien Sijte máttasámi musea ja kulturguovddážii eai leat juolludan ruđa stáhtabušeahttas, muhto ráđđehusbellodagat čujuhit ahte prošeakta lea jođus muhto ii leat gárvvis.
Celko maid ahte ráđđehus čuovvu dárkilit mielde ovdáneami ja dieđiha Stuoradiggái ovdáneami birra 2016:i reviderejuvvon našunálabušeahtas.
Jáhkku vuoruhuvvot
Saemien Sijte museadirektevra Birgitta Fossum ii loga áibbas diehtit sihkkarin maid dat mearkkaša, muhto dulko dan ahte sii eai leat vajálduvvon.
– Mii oaččuimet diibmá stáhtabušeahtas golbma milliuvnna álggahanprošektii, ja go eat leat vel geargan de ii vuoruhuvvo midjiide dán háve ruhta. Go juo leat sierra namuhuvvon stáhtabušeahtas de jáhkán ahte mii vuoruhuvvot go geargat álggahanprošeavttain, lohká son.
Ráđđehusas dáhttu
Fossum rehkenastá ahte go sii álgománuid boahtte jagi mielde gerget álggahanprošeavttain, de ii berrešii leat váttisvuohta oažžut doarjaga álggihit hukset ođđa vistti.
– Mis gal lea jáhkku ahte mii vuoruhuvvot maŋit jagi stáhtabušeahttas, ja go juo leat barggut ođđa vistti huksenplánat leamaš nu guhká, de lea ráđđehusas maid dáhttu ahte dat galgá ollašuvvot, lohká son.
