Ovttajienalaš Stuorradiggi dáhttu ráđđehusa meannudit Norgga našuvnnalaš olmmošvuoigatvuođaásahusa ávžžuhusa sihkkarastit mearrasámiid olmmošvuoigatvuođaid.
Ovttajienalaš Stuorradiggi dáhttu ráđđehusa meannudit Norgga našuvnnalaš olmmošvuoigatvuođaásahusa ávžžuhusa sihkkarastit mearrasámiid olmmošvuoigatvuođaid.
Norgga našuvnnalaš olmmošvuoigatvuohtaásahus lea ráhkadan sierra fáddáraportta mearrasámiid vuoigatvuođaid birra, ja maiddái lea go stáhta vuhtii váldán mearrasámiid kultuvrra.
Raporta lea oassi Našuvnnalaš ásahusa 2016 jahkedieđáhusas Stuoradiggái. Našuvnnalaš ásahus ávžžuha raporttas sihkkarastit mearrasámiid searvanrievtti, materiálalaš kulturvuođustivremii ja hálddašeapmái, vai nagodit sihkkarastit sin guolástanrievtti buoremus lági mielde.
Jahkedieđáhusa meannudii Stuorradikki plenum maŋŋebárgga dán vahkus.
Justiisalávdegoddi lea meannudan Našuvnnalaš ásahusa 2016 jahkedieđáhusa ja sii bukte dán mearráduscealkámuša Stuorradiggái mas sii ávžžuhedje: «Stuorradiggi dáhttu ráđđehusa meannudit Norgga našuvnnalaš olmmošvuoigatvuođaásahusa ávžžuhusaid ja dieđihit Stuorradiggái mo dát ávžžuhusat leat čuovvoluvvon.»
Nuorra, muhto dehálaš ásahus
Stuorradikki preassagovva.
Stuoradiggi mearridii ásahit Našuvnnalaš olmmošvuoigatvuohtaásahusa miessemánu 22. beaivvi 2015.
Justiisalávdegotti sátnejođiheaddji Kari Henriksen (Bb) logai Stuorradikki sárdnestuolus ahte Našuvnnalaš ásahus lea nuorra ásahus, muhto seammás hui dehálaš ásahus.
– Lávdegoddi lea ovttajienalaččat árvalan ahte Stuorradiggi berre čuovvolit mo olmmošvuoigatvuođat vuhtii váldojuvvojit buoremus lági mielde. Ferten giitit Našuvnnalaš ásahusa go leat buktán vuđolaš cealkámuša. Stuorradikkis boahtá leat buorre gulahallan Našuvnnalaš ásahusain, dajai Kari Henriksen.
Mo čuovvolit
Našuvnnalaš ásahusas ledje golbma ávžžuhusa Stuorradiggái, okta dain lei sihkkarastit mearrasámiid searvanrievtti, materiálalaš kulturvuođustivremii ja hálddašeapmái.
– Lávdegoddi lea gávnnahan ahte buoremus vuohki mo Stuorradiggi sáhttá čuovvulit dáid ávžžuhusaid, lea dáhttut ráđđehusa guorahallat ávžžuhusaid ja dieđihit Stuorradiggái mo dát ávžžuhusat leat čuovvoluvvon, dajai Justiisalávdegotti sátnejođiheaddji Kari Henriksen Stuorradikki sárdnestuolus.
Stuorradiggi jienastii ovttajienalaččat doarjut Justiisalávdegotti mearráduscealkámuša ráđđehussii.
Eahpečielggas mo čuovvoluvvo
Norgga našuvnnalaš olmmošvuoigatvuohtaásahusa direktevra lohká leat eahpečielggasin mo ráđđehus čuovvola sin ávžžuhusaid.
– Dat mii lea gelddolaš dál lea mo ráđđehus čuovvola min ávžžuhusaid. Mis galgá leat oktavuohta gullevaš departemeanttain ja guorahallat maid sii dahket min ávžžuhusain mearrasámiid olmmošvuoigatvuođaid ektui. Dál lea fargga geasseluopmu ja bušeahtta, nu ahte dat váldá áiggi, dadjá Norgga našuvnnalaš olmmošvuoigatvuohtaásahusa direktevra, Petter Wille.
