Ráđđehusa neahttasiiddus čuožžu ahte buohkat, geat bohtet Norgii, fertejit registreret iežaset, ja dat guoská maiddái norgalaččaide.
– Lea nu ahte beroškeahttá boahkkográdas, de fertejit sii geat bohtet Norgii leat registrerejuvvon ja váldit iskosa rájá alde. Jos ii leat iskanstašuvdna rájás, de ferte váldit iskosa ovdal 24 diimmu leat mannan. Juste dál lea Lappi oránša, ja vaikko ii leat boahkuhuvvon, de ii ferte erremii, muitala Svein Arne Midtli, Finnmárkkus rádjabearráigeahču oassejođiheaddji.
Son dadjá ahte jos ii leat ollásit boahkuhuvvon ja boahtá guovllus olggobeale Norgga, de ferte leat negatiiva iskkus mii lea váldon maŋemuš 24 diimmu ovdal go olle rádjái. Dat guoská vaikko guovllus lea errengeatnegasvuohta.
– Jos guovlu gos boahtá lea ránis, ruoksat dahje sevdnjesruoksat de ferte erremii nu guhká go ii leat ollásit boahkuhuvvon. Norgga ássit, geat eai čuovo sisamátkkošteami njuolggadusaid, eai gildojuvvo boahtimis Norgii, muhto sáhttet váidojuvvot. Olgoriikalaččat, geat bohtet Norgii, muhto eai ollašuhte sisamátkkošteami ja koronanjuolggadusaid gáibádusaid, sáhttet biddjot eret, dadjá Midtli.
Son maid muitala ahte Suoma eiseválddiin lea ovddasvástádus mátkkiide Supmii. Sii čuvvot sisamátkkoštannjuolggadusaid Norgga várás, ja maid barget Suomas lea sin duohken, muhto eai gieldde geange mátkkošteames Supmii Norggas.
Jos leat ollásit boahkuhuvvon dahje lea leamašan covid-19, ja dus lea koronasertifikáhtta:
Gáibádus váldit iskosa maŋŋel go boađát riikii. Galgá váldit iskosa rádjaiskanstašuvnnas. Jos ii gávdno, ii leat rabas dahje eisseválddit leat dieđihan ahte ii galgga iskosa váldit rájá alde, de galgá váldit iskosa eará sajis dahje ruovttus ovdal go 24 leat mannan maŋŋel go boađát. Jos lea positiiva jođánisiskkus, de galgá váldit PCR-iskosa nu jođánit go vejolaš.
Jos ii leat koronasertifikáhtta, de ferte váldit iskosa ovdal go boahtá Norgii. Seamma guoská jos ii leat leamašan korona dahje ii leat boahkuid váldán.
