-Almmuhus-
OĐĐASATRáđđehus juolludan ruđa golmma ođđa kvena guovddážii

Ráđđehus juolludan ruđa golmma ođđa kvena guovddážii

-

-

– Giellaguovddáš lea dehálaš funkšuvdna nannen dihtii giela mii lea áitojuvvon servodagas. Dan sivas lea illudahtti ahte ráđđehus juolluda doarjaga ásahit guokte ođđa kvena giellaguovddáža Finnmárkui, dadjá Gieldda- ja ođasmahttinministtar.

Gieldda- ja ođasmahttinministtar Monica Mæland finadii duorastaga Porsáŋggus guossis, gos almmuhii ahte ráđđehus lea juolludan addit doarjaga ásahit guokte ođđa kvena giellaguovddáža Finnmárkui ja ovtta Návutnii.

– Mii háliidat nannet barggu, seailluhit kvena giela Romssas, doarjagiin ásahit giellaguovddáža Návutnii, dadjá Gieldda- ja ođasmahttinministtar Monica Mæland. Oktiibuot 2,56 miljovnna kruvnna juolluda ráđđehus dán golmma ođđa kvena giellaguovddážii, mat galget ásahuvvot Porsáŋgui, Čáhcesullui ja Návutnii.

 

Giellaguovddážat dehálačča

Kvena birrasis leat guhkit áigge bidjan ollu návccaid seailluhit ja nannet kvenagiela.

Ráđđehus lea čuovvolan barggu. Lassin dan golbma ođđa giellaguovddážii de leat guokte giellaguovddáža ovddežis, Omasvuonas ja Ráissas, čállá ráđđehus preassadieđáhusas.

Nannet kvenagiela lea guhkit áigge proseassa.

Kvena giellaguovddážat Finnmárkkus ja Romssas lea dehálaš oassi barggus.

– Giellaguovddážat leat mielde váikkuheamen giela nannemis, beroškeahttá mo báikkálaš dilli ja dárbbut leat. Guovddážiin lea iešguđet doaimmat iešguđet ahkejoavkkuide, čállá ráđđehus.

 

Sávvá movttiidahttit

Dávjá lea giellaguovddážiin ollesolbmuidoahpahus, ja barget oahpponeavvuid ovdánahttimiin, lágidit maid iešguđet giela- ja kulturkurssa.

Muđuid lágidit giellaguovddážat dávjá aktivitehta mánáid ja nuoraid várás, mas lea giella ja kultuvra fáddán.

– Mun sávan dát golbma ođđa kvena guovddáža movttiidahttet eambbosiid oahppat giela ja sii geat máhttet giela ovddežis geavahit giela eambbo, lohká Monica Mæland.

 

Illudahtti ođas

Porsáŋggu hálddahushoavddas Gunhild Ingilæ Haukenesas eai leat sánit go oažžu dieđu ahte leat ožžon juolludeami.

– Lea hirpmástuhtti buorre, lean nu movtta. Dat mearkkaša ahte mii sáhttit bargat eambbo nannet giela ja kultuvra. Mii leat guhká bargan dán ovdii, dá lei duođaid buorre ođas ja álgu viidáseappot bargguide, dadjá Haukenes.

 

Golbma ođđa kvena giellaguovddáža

Návuona suohkanii lea juolluduvvon 560 000 kruvnna ásahit ođđa giellaguovddáža.

Várjjat museii, Čáhcesullui, ja Porsáŋggu gildii lea juolluduvvon miljovdna goappáge giellaguovddážii.

-Almmuhus-