– Dál vudjet beaivválaččat birrasii 140 000 olbmo gárrensdilis geainnuid alde Norggas. Sii sáhttet eai dušše iežaset, muhto maid mieljohtoleaddjiid roasmmehuhttit. Mii háliidat nannet gárrendili dárkkisteami. Mii háliidat maid ahte Tuolloásahus riikkarájá alde mas lea dárkkistangelbbolašvuohta, galggašii beassat dárkkistit lea go vuodjimin gárrendilis, lohká johtalusministtar Jon-Ivar Nygård.
Johtalusministtar Jon-Ivar Nygård čilge ahte dál lea dušše politiijas váldi čađahit gárrendili dárkkisteami vuodjima hárrái. Tuolloásahus bisseha juo dál biilavuoddjiid geat eahpitkeahttá eai leat čielgosat, muhto nu guhká go Tuolloásahus ii sáhte testet biilavuoddji, de beassá biilavuoddji joatkit mátkki ja sáhttá ain roasmmehuhttit sihke iežas ja eará johtaleaddjiid. Dál sádde ráđđehus ášši gulaskuddamii.
Tuolloásahus sáhtášii bissehit gárren biilavuoddjiid
Johtalusdepartemeanta evttoha ovttasráđiid Justiisa- ja gearggusvuođadepartemeanttain ja Ruhtadandepartemeanttain ahte Tuolloásahus oččošii válddi testet mohtorvuojániid vuoddjiid leat go vuodjimin gárrendilis go sii čađahit tuollodárkkisteami. Jus čájehuvvo ahte vuoddji ii leat čielggus dahje geahččala beassat das eret, de oččošii Tuolloásahus dainna evttohusain válddi bissehit mohtorvuojánvuoddji dassážii go politiija sáhttá čuovvolit ášši.
