Ráđđehus evttoha dál nannet lágas bajitnjuolggadusaid konsultašuvnnaid birra, sierra kapihttalis sámelágas. Dás lea vuosttažettiin sáhka fievrridit viidáset njuolggadusaid otná prosedyrain «Stáhta eiseválddiid ja sámedikki gaskasaš konsultašuvnnaid prosedyrat».
– Čielga njuolggadusat konsultašuvnnaide áššiin mat gusket sámi beroštumiide, sáhttá mielddisbuktit beaktilit proseassaid ja eanet diehttevašvuođa beliide, dadjá gieldda- ja ođasmahttinministtar Monica Mæland preassadieđáhusas.
Konsultašuvnnat galget sihkkarastit ahte sámi beroštumit bohtet sisa árrat proseassain, ja ahte sis lea vejolašvuohta váikkuhit mearrádusaid. Goappaš bealit galget searvat prosessii dainna ulbmiliin ahte boahtit ovttaoaivilvuhtii, muhto leat ain eiseválddit geat dahket loahpalaš mearrádusa.
