Badjel 500 norgalačča jápmet iešsorbmema geažil juohke jagi. Dál dáhttu ráđđehus eastadit iešsorbmema ođđa doaibmaplánain.
Badjel 500 norgalačča jápmet iešsorbmema geažil juohke jagi. Dál dáhttu ráđđehus eastadit iešsorbmema ođđa doaibmaplánain.
Čakčamánu 10. beaivvi lea máilmmi iešsorbmeneastadanbeaivi.
Dan olis almmuha ráđđehus ahte leat bargagoahtán ođđa doaibmaplánain mii galggašii eastadit iešsorbmema.
– Juohke iešsorbmen lea stuora tragediija sihke sutnje gii ii šat nagodan eallit ja oapmahaččaide geat báhcet stuora morrašii. Iešsorbmen lea maid stuora vahát servodahkii. Danin fertet vuđolaččat eastadit iešsorbmema. Mii fertet árabut fuomášit ovttastusaid ja signálaid, ja danin fertejit ođđa doaibmaplána doaibmabijut fátmmastit máŋga servodatoasi, dadjá vuorrasiid- ja álbmotdearvvašvuođaministtar Åse Michaelsen.
Viiddis bargu
Dearvvašvuođadirektoráhtta ja álbmotdearvvašvuođainstituhtat galget čohkket dieđuid doaibmabijuid birra mat čájehuvvojit doaibmat eastadanbarggus.
Fágabirrasat, pasieanttaid- ja oapmahaččaidjoavkkut galget maid mielde ođđa doaibmaplánabuvttadeamis.
Dán barggus šaddá maiddái iešsorbmen psyhkalaš dearvvašvuođasuddjema pasieanttaid gaskkas dehálaš fáddán.
Ođđa logut oainnat čájehit ahte oallugat geat sorbmejit iežaset leamaš divššus.
Buohkat sáhttet váikkuhit
– Go galgá eastadit iešsorbmema, de lea maid dehálaš fuolahit ahte mánáin ja nuorain lea oadjebas dilli. Sis galget deaivvadanbáikkit ja sis galgá dorvu jus vásihit losses miela. Danin leat nannen dearvvašvuohtaguovddážiid ja skuvladearvvašvuođabálvalusa, mii leat maid fuolahan ahte gielddain leat lassi psykologat. Mis lea maid bargu jođus mii galgá addit olbmuide buoret divššu psyhkalaš váttuid ja gárrenmirkogeavaheami vuostá. Dattetge ii ábut dušše dearvvašvuođafálaldagaid nannet eastadan dihtii iešsorbmema. Buohkat sáhttet váikkuhit dasa. Mii fertet duostat jearrat jus ballat ahte soames ii šat nagodivčče eallit, ja mii fertet duostat beroštit guđet guoibmásiin, dadjá dearvvašvuođaministtar Bent Høie preassadieđáhusas.
