Áigot geahpedit badjel 1500 bohcco Hardangerduoddaris.
Norgga ráđđehus čállá sin neahttasiiddus ahte sin mielas lea dehálaš jođánit ásahit doaibmabijuid ráddjen dihtii njoammuma ja vejolaččat bissehit CWD-dávdda (dárogillii skrantesjuke) Hardangerduoddaris.
Biebmobearráigeahčču ovttas Birasdirektoráhtain ovdanbukte cuoŋománus sin fágalaš ávžžuhusaid gieđahallamis CWD-dávdda Hardangerduoddaris. Ráđđehus lea mearridan čuovvut dan ávžžuhusa.
Lea mearriduvvon ahte oassemearri sarváin mat leat 3 ½ jagi dahje boarraset, ferte geahpeduvvot unnimusmearrái jagis 2021, vai lohku lahkona nulla. Dasa lassin lea mihttu geahpedit 1000-1500 álddu. Maŋŋel 2021 bivddu galget árvvoštallat dárbbu ásahit liige doaibmabijuid 2021/22 dálvái.
– Vai galgat sáhttit dáistalit dávdda vuostá, de fertet sihkkarastit dearvvaš bohccuid ja eará sarvvafuođđuid boahtteáiggi. Mii bidjat vuođđun ođđa máhtu, iskosbohtosiid ja ovttasbarggu Hardangerduoddara geavaheddjiiguin, dadjá eanadoallo- ja biebmoministtar Olaug Bollestad (KrF).
Stáhtačállit Eanadoallo- ja biebmodepartemeanttas ja Dálkkádat- ja birasdepartemeanttas leat čoahkkinastán Biebmobearráigeahčuin, Birasdirektoráhtain, Hardangerduoddara goddelávdegottiin ja sátnejođiheddjiiguin Hardangerduoddara guovllus, dieđihan dihtii ráđđehusa mearrádusa.
