-Almmuhus-
OĐĐASATRáđđehus áigu eanet lulli- ja julevsámegielat oahpaheddjiid

Ráđđehus áigu eanet lulli- ja julevsámegielat oahpaheddjiid

-

-

Maŋemus logi jagi leat eanet oahppit háliidan oahppat lullisámegiela. Ráđđehus juolluda dan dihte lassi ruđaid vai nagodit gokčat dárbbu eanet oahpaheddjiide.

– Vai sihkarastit doarvái oahpaheddjiid geat máhttet oahpahit sámi gielaid, de áigu ráđđehus nannet lullisámegielat ja julevsámegielat oahpaheddjiid ja juolluda 2,5 miljovnna ruvnnoa, muitala máhtto- ja integrerenministtar Jan Tore Sanner preassadieđáhusas man sáddii Sámi álbmotbeaivvi.

 

Nannejit ja rekrutterejit

Departemeanta dieđiha ahte sáhttá gártat dan dillái ahte oahppit eai beasa sámegieloahpahusa oažžut, man galgá leat riekti oažžut, jus eai rekruttere eanet oahpaheddjiid daidda giellafágaide.

Lea Oahpahusdirektoráhtta mii lea ožžon barggu ovdánahttit ortnegiid nu ahte eambbogat sáhttet šaddat váldit lulli- ja julevsámegiela oahpaheaddjioahpuid. Ortnet lea oahpaheddjiide geat leat jo skuvllain barggus, muhto geain váilu dát máhttu, ja sidjiide geat áigot vuođđoskuvlaoahpaheaddjiohppui. Nord universitehtas leat jo álggahan doaimma ovdánahttit fálaldaga oahpaheaddjioahpahusa mii guoská lulli- ja julevsámiide.

 

Ođđa doaibma lea lassin dan ortnegii mas luitet oahppoloana 210 000 ruvnnuin studeanttain geat váldet oahpaheaddjioahpu vuođđoskuvlla váste mas lea sámegiella fágabirrasis.

(©NTB)

-Almmuhus-