-Almmuhus-
-Almmuhus-
OĐĐASAT Ráđđegoahtá Sosialisttalaš Gurutbellodagain

Ráđđegoahtá Sosialisttalaš Gurutbellodagain

-

-

Deanu Bargiidbellodat ja Sosialisttalaš Gurutbellodat dáhttuba ovttasbargat boahtte áigodagas.

– Deanu Bargiidbellodaga ja Sosialisttalaš Gurutbellodaga šiehtadallanlávdegottit háliidit ovttasbargat 2015-2019 suohkanválgaáigodagas. Min bellodagat leat lagamusat politihkalaččat ja min jienasteaddjit vurdet min ovttasbargat boahttevaš jagiid, čállá Bargiidbellodaga Frank Martin Ingilæ preassadieđáhusas.

 

Dát lea čielggaduvvon maŋŋil go bellodagat ikte deaivvadeigga šiehtadallat. Bargiidbellodat (Bb) leige čielga válgavuoiti Deanus, go beasai ovcciin áirasiin gielddastivrii. Sosialisttalaš Gurutbellodat (SG) beasai ges ovttain áirasiin gielddastivrii.

Deanu gielddastivrras leat 19 áirasa, nu ii dárbbaš ge Bargiidbellodat eambbo go ovtta olggobeale áirasiin ovttasbargat oažžun dihte eanetlogu.

 

Soabadan ikte

Ievttá čoahkkimis sohpe bellodagat ahte áigot hábmet politihkalaš ovttasbargošiehtadusa boahttevaš njealji jagi váste.

Dasa lassin mearriduvvui ahte Frank Martin Ingilæ joatká sátnejođiheaddjin, Elisabeth Erke (Bb) ges šaddá várresátnejođiheaddji.

SG gielddastivrraáirras Astrid Kjølås galgá ges beassat ovdagoddái.

 

– Mii háliidat maid bovdet Árjja ja Sámeálbmot Bellodaga šiehtadallamiid guorahallat leago vejolaš mis viiddidit politihkalaš ovttasbarggu, čállá Ingilæ.

-Almmuhus-