Sámi giellavahkku Kárášjogas:
Sámi Girječálliid Searvi (SGS) ja Kárenaš Sámi Giella- ja kulturguovddáš Kárášjogas lágidit rabas čoahkkima sámegiela árvvosmahttimis.
Čoahkkima fáddán lea mo gievrudit ja ovddidit sámegiela servodagas. Čoahkkimis leat iešguđet jienat mat čuvgejit mo bargu ovdána loktemis ja nannemis sámegiela. Sáhkavuorut buktet ovdan mo loktet, čalmmustahttit ja atnit sámegiela, vai dat gullošii, oidnošii ja oččošii saji nu ollu oktavuođain go vejolaš, vai giella čuodjá. Golbma nuorra servodat- ja giellaáŋggirdeaddji buktet čielga ávžžuhusaid (apeallaid).
Sáhkavuorut:
-Guovdageainnu sátnejođiheaddji Hans Isak Olsen: Mo suohkan ovddida sámegiela
-Sámi allaskuvlla 1.lektor Berit Anne Bals Baal: Sámegiela árvvosmahttin
-Girječálli Elle Márjá Vars: Árgabeaivvi sámegiella
Áŋggirdeaddjit:
-Saia Stueng, girjjálašvuođa- ja gielladiehtti ja Risten Biret Elle Eira, giellaberošteaddji: Giellanannen máná bajásgeassimis
-Lemet Máhtte Eira Sara (neahta bokte), oahpaheaddjistudeanta Sámi allaskuvllas: Sámegiela seailluhit Minecraft dihtorspealus.
Rabasčoahkkin lágiduvvo servodatviesus vuossárgga golggotmánu 25. b. 2021 ti. 19-20.30. Čoahkkin lea sáme- ja dárogillii.
