Olu riikkain lassánedje psykalaš váttut go koronapandemiija giddii servodagaid, muhto nu ii dáhpáhuvvan Norggas.
Go koronapandemiija leavai máilbmái ja giddii servodagaid, de lassánedje maiddái psyhkalaš váttut olu riikkain. Norggas gal ii hedjonan olbmuin psyhkalaš dearvvašvuohta, čájeha Norgga Álbmotdearvvašvuođainstituhta guorahallan.
Dutkan lea dahkon Troanddimis gos leat čuvvon 2000 olbmo psyhkalaš dearvvašvuođa. Guovvamánus, ovdal go koronavirus njoamui Norgii, de ledje 15 proseanttas psyhkalaš váttut. Lohku njiejai 8 prosentii njukča- ja cuoŋománus. Geasse- ja suoidnemánus ledje 14 proseanttas psyhkalaš váttut ja borge- ja čakčamánus ges 12 proseanttas.
– Mii gávnnaheimmet ahte psyhkalaš váttut, iešsoardinjurdagat ja iešsoardinlogut bisso stabiilan olles jahkebeali maŋŋel go koronapandemiija leavai deike. Lea váttis diehtit manin psyhkalaš dearvvašvuohta buorránii guokte álgo mánu, dadjá Norgga álbmotdearvvašvuođainstituhta seniordutki Ann Kristin Knudsen.
Ovdalaččas leamaš hupmu ahte olbmot eai šat nu huššan maŋŋel go servodat giddii, muhto dássážii ii leat čađahuvvon dutkan dán ektui.
(©NTB)
