-Almmuhus-
OĐĐASATProfeššu­nealla jietna­studio Guovda­geidnui

Profeššu­nealla jietna­studio Guovda­geidnui

-

-

Sámediggeráđđi lea juolludan 500 000 ruvnno hukset profeššunealla jietnastudio Guovdageainnus.

Internašunála Sámi Filbmainstituhtta (ISFI) lea duogábealde gieskat ásahuvvon vuollefitnodaga, Duottar Studio. Duottar Studio AS galgá doaimmahit jietnastudio ja redigerenfasilitehtaid filbmii ja TV:i. Ulbmilin lea ahte doaibma galgá fállat ja buvttadit filbmadubbema ja maŋŋebarggu TV buvttademiide, ja dasto fállat láigohit jietnastudio ja redigerenlanja filbma- ja TV-suorgái.

– Dál ii gávdno makkárge infrastruktuvra filmmaide guovddáš sámi guovlluin ja Duottar Studio de duhtada dárbbu mii lassána jagis jahkái, go eanet sámi filmmat ja dubben-buvttadeamit čađahuvvojit, dadjá sámediggepresideanta Aili Keskitalo (NSR) preassadieđáhusas.

– Dehálaš sámegielaid ovddideapmái

Duottar Studio lea sámi suohkanis ja lahka davvisámegielat taleanttaid. Sámi guovlluin eai gávdno dál filbmafasilitehtat main lea dákkár standárda.

– Dát fálaldat lea deaŧalaš sámegielaid ovddideapmái ja bisuheapmái, ja hutkás ealáhusaid ovdáneapmái. Studio váikkuha ahte min kulturbargit ja taleanttat sáhttet muitalit iežaset muitalusaid, min iežamet gillii, masa geavahit teknihkalaš fálaldaga mii ovdal ii leat gávdnon davvin, dadjá sámediggepresideanta Aili Keskitalo.

-Almmuhus-