Norgga gonagasnieida Märtha Louise lea cealkán eret iežas almmolaš doaimmaid, muhto son doalaha prinseassa árvonama.
Prinseassa Märtha Louise dáhttu čájehit čielgaset rájá iežas priváhta ealáhusdoaimmain ja Gonagasviesu čanastumis.
Danin lea ovttas lagamus bearrašiin mearridan ahte ii šat čađat almmolaš doaimmaid Gonagasviesu ovddas.
Go prinseassa cealká eret iežas almmolaš doaimmaid, de mielddisbuktá dat earret eará ahte son ja su irgi Durek Verrett, geainna lea lohpádallan, eaba galgga geavahit prinseassanamahusa iežaska sosiála mediain, mediabuvttadeamis ja eará gávppálaš doaimmain. Soai eaba galgga eará Gonagasviesu lahtuid ge namuhit dáid doaimmaid oktavuođas (Prinseassa Instagram namma @PrincessMarthaLouise spiehkasta dás).
Oassin Gonagasbearrašis
Gonagasviessu dieđiha preassadieđáhusas ahte Durek Verrett šaddá oassin Gonagasbearrašis go náitala prinseassain. Son ii oaččo makkár ge árvonama, ii ge galgga ovddastit Gonagasviesu. Dát leamaš dáhpin Gonagasbearrašis, ná leamaš maiddái Erling Lorentzen, Johan Martin Ferner ja Ari Behn ektui.
Prinseassa Märtha Louise ja Durek Verret oassálastiba bearašlaš dilálašvuođain dego ovdamearkka dihte riegádanbeivviin. Soai leaba maid mielde go olles Gonagasbearaš čoahkkana stuora valáštallandoaluide, dát lea bearraša árbevierru.
Ain prinseassa
Vaikke gonagasnieida ii šat dáhto ovddastit Gonagasviesu, de lea Gonagas Harald mearridan ahte Märtha Louise bisuha prinseassa árvonama.
Gonagas ja Dronnet giitiba Prinseassa Märtha Louise go lea máŋgalot jagi čađahan dehálaš áŋgiruššama almmolaš doaimmain.
– Son lea čađahan bargguid ovdamorrašiin, liekkus váimmuin ja nanu beroštumiin, cealká Gonagasbárra.
