– Orrot ruovttus jus ehpet oro dearvašat.
– Mis leat dál vihtta duođaštuvvon koronanjoammuma. Justa dál leat njealjis dain Leavnnjas, ja okta lea Hámmárfeastta buohcceviesus, dadjá gieldda ovdánahttinossodaga ja preassa ovddasteaddji Kjell Magne Rasmussen Ávvirii.
Eai dieđe gos lea vuolgán
Porsáŋggu gielda lea ožžon dieđu ahte lea ollesolbmos sáhka. Son lea ruovttuerremis ja manná bures suinna. Rasmussen muitala sii eai dieđe leat go dán olbmos čanastagat buohcceviesu korona leavvamii.
– Dát dieđut eai leat mus. Njoammunguorranjoavku lea dál guorramin luottaid, dadjá Rasmussen.
Nannen bargojoavkku
Gieldda bealis leat dál nannen njoammunguorranjoavkku.
– Mis leat eanet olbmot bargamin guorramiin dál ja lea maid buoret kapasitehta iskosiid dáfus, dadjá Rasmussen.
Diehtu
Sus lea čielga diehtu Leavnnja ássiide.
– Orrot ruovttus jus ehpet oro dearvašat, ja čuvvot Álbmotdearvvašvuođainstituhta (FHI) njuolggadusaid, dadjá Rasmussen.
