Porsáŋggu gielda dieđiha ahte gielddas lea okta olmmoš testen covid-19 positiivan ja lea biddjon erremii.
Porsáŋggu gielda dieđiha gaskavahku ovdalgaskabeaivvi, njukčamánu logát beaivvi, iežaset ožžon dieđu ahte okta báikeolmmoš, gii lea fitnan olgoriikkas, lea testen covid-19 positiivan.
– Dat olmmoš lea mannan njuolga erremii Porsáŋggus go bođii olgoriikkas. Dan olmmoš ii leat lahka ovttage eará olbmo ja čohkká dál ruovttus okto. Njoammunguorran lea heaittihuvvon, cealká Porsáŋggu gielda ruovttusiiddus.
