Sus geas lea duođaštuvvon Covid-19 lea biddjon isolašuvdnii ja lagasoktavuođat leat erremis.
Porsánŋggu gielda čállá preassadieđáhusas ahte leat álgán njoammunguorramiin.
Finnmárkku riikasuodjalusas galggai lágiduvvot rabas beaivi Porsangmoenis lávvardaga borgemánu 14. beaivvi. Dan leat heaittihan dan dihte go duođaštuvvui njoammun leairras.
Porsangmoen sajusmajora, Jan Ove Holmen, dadjá preassadieđáhusas ahte lea šállošahtti go fertejit heaittihit rabas beaivvi, muhto hehttet njoammunleavvama lea deháleamos.
– Dál lea dehálaš gáhttet iežamet bargiid ja soalddáhiid. Finnmárkku riikasuodjalus ja mii geat jođihat leairra, oktan Ruovttusuodjalusain geat duođaštedje njoammuma, mis leat buorit bargomállet birgehallat dakkár dilis. Mii doaivut ahte beassat lágidit rabas beaivvi fas jagi geahčen, dadjá Holm preassadieđáhusas.
