– Dát kampánja lea Facebookas, Instagrámmas ja fargga Snappas, muitala politiijabajitbálvá ja oktasaš eastadeaddji sekšuvnna sekšuvdnahoavda Karen Julie Eira.
Mánnodaga leat Finnmárkku politiijat rahpan chat-doaimma iežaset Instagrámmas ja Facebookas. Dan doaimma gohčodit Neahttapatruljan. Neahttapatrulja galgá reaidu vai olbmuide lea álkit váldit oktavuođa politiijaiguin neahta bokte.
Politiijabajitbálvá ja oktasaš eastadeaddji sekšuvnna sekšuvdnahoavda Karen Julie Eira muitala ahte leat ožžon strategalaš doaibmaplána Politiijadirektoráhtas. Okta doaibma maid galget bargat lea eastadanbargu ja dat bistá gitta 2025 rádjái.
– Strategalaš doaibmaplána muitala movt mii galgat bargat ja guđe barggu mii galgat deattuhit, muitala Eira.
Neahttapatrulja ulbmil
Eira muitala ahte neahttapatrulja ulbmil lea geahččalit oažžut olbmuin luohttámuša.
– Ulbmil lea oažžut eambbo luohttámuša lagasbirrasis ja Finnmárkkus.
Son muitala maid ahte galgá álkit politiijaiguin váldit oktavuođa ii ge galgga dárbu mannat politiijakantuvrras jus lea mihkkege.
– Jus lea okte unna áššáš mii váivvida du, mii deaddá du dahje lea mihkke maid háliidat jearrat, de lea dušše čálistit midjide.
Gažaldagaid geahččalit politiijat vástidit nu bures go sáhttet, ja jus eai máhte dalán vástiđit, de isket dan lagabui.
Sávvá olahit olbmuid
Dat mii lea earenoamáš neahttapatruljain lea ahte politiijat eai čiega identitehta, nu ahte son gii váldá oktavuođa oaidná geainna čálaša.
– Mii atnit albma govaid nu ahte diehtá geainna hupmá. Ii leat dainnalágiin ahte dárbbaša čiegadit gii čállá ja vástida.
– Dat soaitá lea veahkkin dagaheame ahte olbmot dustet álkibut váldit oktavuođa.
Sáhttá sámegillii váldit oktavuođa
Neahttapatruljas leat sámegielat politiijat maid barggus, go Eira mielas hui dehalaš ahte sámegielagat sáhttet váldit oktavuođa sámegillii.
– Mu mielas lea hui dehalaš ahte sáhttá sámegillii váldit oktavuođa.
Eira muitala maid ahte go Neahttapatrulja rahpasii, de ii mannan galle minuhta ovdal go ožžo sámegillii jearaldaga. ja son ávžžuha olbmuid váldit oktavuođa sámegillii.
– Soaitá šaddat veahá vuordit ovdal go oažžu vástádusa, go mii eat leat nu ollu sámegielagat geat bargat Finmárkku politiijaguovddážis, muhto mii geahččalit vástidit nu jođánit go sáhttit, muitala Eira.
Eastadit neahtas
Politiijat eastadit neahtas go doppe áigot čuovvut mielde makkár vearredagut dáhpáhuvvet miehtá Finnmárkku.
– Midjiide galgá álkit čuovvut mielde sihke interneahta bokte, muhto maiddái obbalaččat Finnmárkkus. Nu ahte lea álkit fuobmát makkár vearredagut leat.
Neahttapatruljas čohkkájit olbmot Girkonjárggas, Álttás ja Čáhcesullos.
Ásahan Nettpatrulja
Finnmárkku politiijat leat dál rievdađan iežaset Facebook- ja Instagram-siiddu nu ahte oaidná ahte lea Neahttapatrulja mii lea neahtas.
– Mii leat rievdadan siiddu nu ahte oaidná ahte lea Neahttapatrulja mii lea Finnmárkku politiijaguovddáža politiijasiidu, muitala Eira.
Vahkku mielde bidjá Neahttapatrulja sáhkavuoruid Facebook- ja Instagram-siidduide, mat muitalit eambbo mii Neattapatrulja lea ja mii lea ulbmil dainna ásahemiin.
– Mii almmuhit maiddái dáid beivviid ovtta ođđa sáhkavuoru mii muitala veahá eambbo Neahttapatrulja birra.
Eira jáhkká ja sávvá ahte olbmuid mielas lea buorre ja dehálaš ahte sii leat maid eambbo oidnosis sosiála mediain.
Sávvá olbmuid váldit bures vuostá
Eira sávvá ahte olbmot váldet bures vuostá politiijaid sosiála mediain ja ahte sii geavahit dan bures, muhto lea dehalaš su mielas maiddái deattuhit ahte jus lea heahti, de riŋge heahtenummarii.
– Munnje lea dehálaš oažžut ovdan ahte jus lea heahti, de ii leat riekta čálistit Messengera bokte, de ferte riŋget heahtenummarii.
