Áššáiduhtton servodatnjunuš Romssas šaddá čohkkát njeallje vahkku háldogiddagasas. Politiijat leat viiddidan áššáiduhttima guoskat eambbo olbmuide.
Áššáiduhtton servodatnjunuš Romssas šaddá čohkkát njeallje vahkku háldogiddagasas. Politiijat leat viiddidan áššáiduhttima guoskat eambbo olbmuide.
– Áššáiduhttima vuođđu lea viiddiduvvon das ahte ovdal guoskkai ovtta gillájeaddjái, dál guoská fas eambbo eahpeidentifiserejuvvon vejolaš gillájeddjiide. Dat mearkkaša ahte politiijat navdet ahte áššáiduhtton olmmoš lea dahkan dahje geahččalan dahkat sullasaš diŋggaid olbmuid vuostá geaid eat dieđe vuos geat leat, lohká Romssa politiijaguovllu politiijainspektevra ja sekšuvdnahoavda Elin Nordgård Strand.
Almmái váldui gitta ovddit gaskavahku, ja beaivvi maŋŋel biddjui háldogiddagassii vahkkui, reivve- ja gallededdjiiddárkkisteami vuollái.
Duorastaga giddagasčoahkkimis Davvi-Romssa diggegottis Romssas, bivde politiijat háldogiddagas áigodaga guhkiduvvot njealji vahkkui, go balle duođaštusaid sáhttit jávkat.
Almmái lea áššáiduhtton go galgá leat geavahan iežas ámmáha olahan dihte seksuála ovttastallama.
Áššáiduhttimii gullá maid ahte galgá leat boastut ávkkástallan vuollel 18-jahkásaš olbmo guhte lea leamaš hearkkes eallindilis.
Servodatnjunuš lea biddjon reivve- ja gallededdjiid-dárkkisteami vuollái giddagasáigodagas.
Isket leat go eambbo gillájeaddjit
Diggegotti dattetge oaivvilda ahte dušše álgoáššáiduhttimii lea doarvái buorre vuođđu.
Danne jotket politiijat dutkama iskan dihte gávdnojit go eambbo gillájeaddjit.
– Mis lea guovddážis gávdnat olbmuid geaid áššáiduhtton almmái sáhttá leat illastan dahje geahččalan illastit, ja vihttaniid geat sáhtte muitalit juoga dán birra, dadjá Nordgård Strand.
Bivdet Kriposis veahki
Politiijastašuvdnahoavda Anita Hermansen dieđiha ahte politiijat leat bivdán Kriposis veahki dutkamii.
Seammás duođaštit politiijat ahte almmái ovdal lea leamaš dutkamiid vuolde sullasaš dáhpáhusaid geažil. Son váidui politiijaide 2015:s ja dalle maid áššáiduhttui ja burge albmá opmodagaid.
Politiijat duoguštedje dalle máŋga diŋgga, erenoamážit elektrovnnalaš vurkenmediaid.
– Áššáiduhtton almmái gažaduvvui ja maŋŋel dutkama heaittihuvvui ášši váilevaš duođaštusaid geažil. Politiijat isket dál lea go vuođđu dutkagoahtit dien ášši fas, ja mii geahčadat leat go áššiin oktasašvuođat, lohká Nordgård Strand.
Son muitala dál birrasii 15 vihttana gažaduvvon, muhto ahte galget vel muhtin logenáre vihttana gažaduvvot lagamus áiggis.
Seammás jotket politiijat dihtor- ja mobiiladuoguštusaid dutkama, ja sosiála media aktivitehta.
(©NTB)
