Girkomannit fertejit dasa ráhkkanit ahte politiijat fáhkka bohtet girkui go lea ipmilbálvalus.
Jus cavgiluvvo dahje navdet njuolggadusaid rihkkumiid, de sáhttet politiijat dárkkistit girkuid ja geahččat čuvvot go njuolggadusa mas ožžot 50 olbmo eanemusat searvat girkolaš doaimmain oktanaga.
– Mii vuordit ahte girkut ja oskoservvodagat maid háliidit leat mielde unnidit njoammuma álbmogis ja ahte čuvvot njoammuneastadannjuolggadusaid mat leat. Politiijat dárkkistit ahte oskoservvodagat čuvvot njuolggadusaid. Jus rihkkot njuolggadusaid main lea mearri gallis sáhttet searvat ovtta báikái, de sáhttet váidot ja rihkkun sáhttá čuovvoluvvot, lohká Politiijadirektoráhta bargiidjođiheaddji Lars Aune Vårt Land avisii.
Juohke politiijaguovlu ferte árvvoštallat dárbbu čađahit dárkkisteami, lohká son.
– Ii leat vejolaš ahte politiijat dárkkistit buot lágidemiid mat leat. Jus cavgilit, dahje jus navdit rihkkon njuolggadusa, de sáhttá čađahuvvot dárkkisteapmi. Mannan vahkku mearridii ráđđehus ođđa doaimma hehttet korona leavvama. Lágidemiin, mat leat siste, sáhttet leat eanemusat 200 olbmo, muhto dat lea dušše jus stuolut leat skruvvejuvvon gitta láhttái. Girkobeaŋkkat eai leat láhttis gitta, celke eiseválddit bearjadaga, ja girkuin ledje garra vuosttaldeamit. (©NTB)
