-Almmuhus-
-Almmuhus-
OĐĐASATPolitiijat ohcamin nuorra badje­olbmo

Politiijat ohcamin nuorra badje­olbmo

-

-

Politiijat leat dál ohcamin davábealde Ohcejoga Idjavuonduoddara guvlui badjelaš 20-jahkásaš badjeolbmo gean bearaš lea dieđihan láhppon go ii boahtán ruoktot sohppon áigái.

Finnmárkku politiijaguovllu operašuvdnajođiheaddji Stein Hugo Jørgensen muitala sii, politiijat ja Rukses Ruossa eaktodáhtolaš ohccit ja almmá oahpes olbmot leat dál ohcamin davábealde Ohcejoga oarjjásguvlui Idjavuonduoddara. 

– Mii eat leat vuos gávdnan dan olbmo, lohká operašuvdnajođiheaddji Stein Hugo Jørgensen tiibmu 08.30 bearjadagtiđida, njukčamánu viđát beaivvi.

Ávvira dieđuid mielde lea dál guovllus birrasii minus 12-13 gráda buolaš, veaháš borga, muhto lea dál firtemin ja jallemin.

Jørgensen muitala ahte ohcanguovllus lea veaháš buolaš, muhto muđui lea buorre ohcandálki. 

– Helikopter fertii jorgalit ihkku guolddu dihtii. Mii ohcat davábealde Ohcejoga, Idjavuonduoddara guvlui. In dieđe vuhttojit go skohterluottat, sáhttet maid leat jovgon ihkku guolddu dihtii. Min dieđuid mielde lea láhppon olmmoš bures gárvodan, muitala operašuvdnajođiheaddji Stein Hugo Jørgensen.

EAKTODÁHTOLAČČAT: Finnmárkku politiijaguovlu ohcanjoavku, eaktodáhtolaš veahkit ja albmá oahpes olbmot vuolgimin ohcat láhppon albmá oarjjabeale Ohcejoga Idjavuonduoddara guvlui. Govva: Silje Malene Varsi
EAKTODÁHTOLAČČAT: Finnmárkku politiijaguovlu ohcanjoavku, eaktodáhtolaš veahkit ja albmá oahpes olbmot vuolgimin ohcat láhppon albmá oarjjabeale Ohcejoga Idjavuonduoddara guvlui. Govva: Silje Malene Varsi

Bearaš dieđihan albmá láhppon

Politiija operašuvdnajođiheaddji Stein Hugo Jørgensen duođašta ahte lea bearaš mii lea dieđihan badjelaš 20 jahkásaš albmá láhppon go ii boahtán ruoktot sohppon áigái duorastaga, njukčamánu njealját beaivvi. Maŋimuš gulahallan albmáin lei tiibmu 17.30 duorastateahkeda. 

Politiijat leat gulahallan sihke albmá bearrašiin, eará badjeolbmuiguin ja Hovedredningssentralen (HRS) dahje váldogádjunguovddážiin. 

Doivot albmá gávdnot dearvan

Operašuvdnajođiheaddji Stein Hugo Jørgensen muitala ahte ohcanguovllus leat moadde bartta. 

– Almmái lea bures gárvodan. Eat mii dieđe mii lea geavvan. Mii árvvoštallat son soaitá leat muohtaskohteriin darvánan dahje bártidan, dahje skohter sáhttá leat bieđganan dahje almmái soaitá maid leat idjadan muhtin barttas. Mis lea stuorra jáhkku gávdnat su dearvan, lohká operašuvdnajođiheaddji Stein Hugo Jørgensen.

Operašuvdnajođiheaddji Stein Hugo Jørgensen muitala ohcanjoavku lea čoahkkinastán dál iđđedis  ja dál jotket ohcama. 

-Almmuhus-