-Almmuhus-
-Almmuhus-
OĐĐASAT Poli­tiijat ohca­me dievddu gii láhppui ovdal juovla­basiid Hámmár­feasttas

Poli­tiijat ohca­me dievddu gii láhppui ovdal juovla­basiid Hámmár­feasttas

-

-

Finnmárkku politiijaguovlu dieđiha mediaid bokte ahte 21-jahkásaš dievdu Hámmerfeasttas lea dieđihuvvon láhppon ođđajagimánu 5. beaivvi.

Finnmárkku politiijaguovlu háliida oktavuođa olbmuiguin geat leat oaidnán dahje leamaš oktavuođas 21-jahkásaččain. Su namma lea Abdullahi Dayib Mohamud, lea Somalias eret, ja lea orron Hámmerfeasttas 2011 rájes.

Su bearáš dieđihii su láhppon ođđajagimánu 5. beaivvi.

– Láhppon dievddus eai leat nu olu oahppásat ja oidnui maŋemusat Hámmerfeasttas juovlamánu 23. beaivvi 2020:s. Dalle finai son muhtin almmolaš kantuvrras Hámmerfeasttas. Dan maŋŋel eai leat šat politiijain sihkkaris dieđut gos son sáhttá leat. Ii leat mihkkege mii čájeha ahte lea juoga kriminealla dáhpáhus geavvan, dieđiha guorahallanjođiheaddji Bjørn Tore Svendsen.

Politiijat dieđihit ahte láhppon dievdu lea 173 cm guhku, ja lea seaggi. Muhtin áigge ovdal go jávkkai, lei son čuvggodahttán vuovttaid vielgadin. Go maŋemusat oidnui, de ledje sus ain vuoktageažit vielgadat.

Sihtet cavgilemiid

– Politiijat leat ohcan dievddu Hámmerfeastta guovllus, muhto eai leat gávdnan eanet dieđuid ja leat ovttas bearrašiin almmuhan Abdullahi Dayib Mohamud láhppon.

Politiijat sávvet dieđuid oažžut mat muitalit gos láhppon almmái sáhttá leat, ja háliidit oktavuođa olbmuiguin geat leat oaidnán su, dahje geat dihtet gos son sáhttá leat.

– Jus lea dieđut áššis, de válddát oktavuođa Finnmárkku politiijain telefovnnas 78972000 dahje 02800, dieđiha Finnmárkku politiijaguovlu preassadieđáhusas disdaga.

-Almmuhus-