Ođđajagi ávvudeamit leat mannan feara mo miehtá Finnmárkku.
Váile gaskaija áigge dieđihedje Finnmárkku politiijat twitteris, ahte leat šaddan muhtin vuolleahkásaš gándda doalvut doavttervávtta lusa Hammerfeasttas.
Gánda galgá leat leamaš badjelmeare gárremin.
– Dearvvašvuođa bargit áimmahuššet gándda, čállet politiijat.
Maiddái Álttás dieđihedje politiijat alddiineaset leamašan sullasaš barggu.
Badjelaš ovttas ihkku, dieđihedje ahte ledje šaddan doalvut muhtin viđátlot-jahkásaš nisson ruoktot.
Nisu galgá maid leamašan menddo gárremin.
Politiijat eai čuovvol ášši moktege.
Galledan olgobáikkiid
Girkonjárgga politiijat ges gallededje báikki olgobáikkiid.
– Jaskat. Buorre miellaláhki, eai makkárge mearkkšumit, čállet politiijat dan birra.
Rigerii boradanbáikkis
Čáhcesullos šadde ges politiijat fitnat muhtin boradanbáikkis, go dieđihuvvui ahte doppe leai muhtin nuorra dievdu rigeren bargiiguin.
Váile guovttis dieđihedje politiijat ahte váldet albmá mielde ja dolvot ruoktot ja leat gohččon su bissut ruovttus reasta ija.
Maiddái Hammerfeasttas šadde politiijat sáhttostit gárren olbmo ruoktot.
Badjelaš guovttis čállet politiijat ahte almmái galgá rigeren, nu vižže politiijat su ja dolvo su ruoktot.
Badjelaš guovttis dieđihedje politiijat maid ahte leat gohččon muhtin guđátlot-jahkásaš dievddu guođđit Girkonjárgga gávpotguovddáža, go galgá leat fastit láhtten.
– Dievdu ii jeagadan nu váido dán ovddas. Politiijat dolvo su eret gávpotguovddážis.
Doarrán
Veahá maŋŋelaš, diibmu 02.16, dieđihedje ges politiijat ahte Álttás galget njeallje nuorra gándda leat doarrán muhtin priváhta feasttas.
– Albmát ledje suhtadan ja nu doarrán. Politiijat fitne báikkis jaskkodahttimin riiddu. Okta fertii doavttergeahčus fitnat. Ii leat duođalaččat roasmmohuvvan, čállet politiijat.
Sii ásahit ášši dás.
Ribahan olggos nohkkat
Váile golmmas, dieđihedje ges politiijat ahte muhtin goalmmátlot-jahkásaš almmái lei ribahan nohkkat olggos Čáhcesullos.
Eará olbmot dat fuomášedje su ja dieđihedje politiijaide.
Politiijat fitne báikkis.
– Almmái ii leat guhkká veallán dies. Dolvojuvvui ruoktot vai beassá liegga seŋgii baicce velledit, čállet politiiijat.
Ii deaivan ruoktot
Badjelaš golmmaš dieđihedje ges politiijat ahte šadde doalvut muhtin 18-jahkásaš nieidda ruoktot Álttás.
– Son lei hirbmadit gárihuvvan ja geahččalii boasttu stohpui beassat sisa.
Politiijat dolvo su ruoktot gos bearaš lei vuordimin. Politiijat eai čuovvol ášši.
– Diggostalaiga
Beal njealjis dieđihedje ges politiijat ahte guokte dievddu leigga dikkáskan muhtin olgobáikkis Hammerfeasttas.
– Politiijat fitne báikkis ja manne gaskii, nu eaba šaddan doarrát. Dát guovttis gohčohalaiga guođđit gávpotguovddáža, čállet politiijat.
Nohkkan juovlamuora vuollái
Dakka maŋŋil dieđihedje politiijat šaddan doalvut muhtin viđátlot-jahkásaš nissona ruoktot Álttás.
– Gávdnui oađđimin juovlamuora vuolde torgas, dolvojuvvui ruoktot, čállet politiijat.
Fas dikkáskan
Badjelaš beal njealjis dieđihedje politiijat ahte leat fas šaddan mannat guokte dievddu gaskii Hammerfeasttas.
Politiijat sáddejedje albmáid ruoktot.
Doarrun
Váile njealjis iđđedis, dieđihedje ges politiijat ahte muhtin priváhtafeasttas galget muhtinat doarrán Girkonjárggas.
– Okta olmmoš galgá leat huškkohallan feasttas. Mii diehtit gean navdet dahkan dan. Gillájeaddji áigu váidit ášši maŋŋil ođđajagi, dieđihit politiijat.
Goappašagat galgaba leat goalmmátlot-jahkásaš albmát.
Vuolleahkásaččat olgobáikkis
Váile njealjis dieđihedje maid politiijat ahte muhtin olgobáikkis Báhcavuonas, galget leat leamašan golbma vuolleahkásaš gándda.
– Gánddat leat dolvojuvvon váhnemiid háldui. Politiijat ásahit ášši olgobáikki vuostá.
Feastariejat
Maŋŋil go olgobáikkit giddanedje Finnmárkkus, de čoahkkanedje olbmot priváhtafeasttaide feara gos.
Nu šadde politiijat fitnat muhtin dáluin bissehit feasttat.
Sii dieđihit bissehan feasttaid Hammerfeasttas ja Álttás.
– Čolgadii politiijaid njeaiga
Politiijat dieđihit maid muhtin gárren vuollel guoktelot-jahkásaš dievddu šaddan bidjan giddagassii Čáhcesullos, dát lea dáhpáhuvvan beal njealjis.
– Almmái lea muosehuhttán olbmuid.
Almmái galgá leat čolgadan politiijaid njeaiga, ja politiijat čállet áigut ásahit ášši dás.
– Son luitojuvvo luovos go čielgá, čállet politiijat.
