Boazopolitiijat leat oidnosis ollu báikkiin Finnmárkkus ja Davvi-Romssas beassážiid. Sii galget iskat skutervuodjima máđijaid alde ja daid lahkosis.
Boazopolitiijat leat oidnosis ollu báikkiin Finnmárkkus ja Davvi-Romssas beassážiid. Sii galget iskat skutervuodjima máđijaid alde ja daid lahkosis.
– Lea ollu muohta dál, ja skutervuoddjit sáhttet dagahit ahte muohtauđas fierrá. Mii čuovvut dárkilit vuodjimiid mat sáhttet leat várálažžan skutervuoddjái ja mielčuovvuide, dahje earáide geat leat báikkis gos vudjet skuteriiguin. Skutervuodjin várregilggain ja báikkiin gos muohta heaŋgá alla báikkiin leat ovdamearkkat das, muitala Boazopolitiija jođiheaddji ja politiijabajitbálvá Inger Anita Øvregård.
Bossut promillaiskosa
Boazopolitiijat leat juohke beassášbasiid iskame ahte skutervuoddjit čuvvot njuolggadusaid.
– Lassin várálaš vuodjimiidda várregilggain, áigut mii iskat promillavuodjima. Buohkat geaid bissehit fertejit rehkenastit ahte šaddet bossut promillaiskkadeami, muitala Øvregård.
Boazopolitiija jođiheaddji ja politiijabajitbálvá Inger Anita Øvregård. Govven: Nils Johan Vars.
Sávvet oadjebas beassážiid
Politiijat muittuhit olbmuid váldit mielde vuodjinkoartta, vuojánkoartta ja geavahit oaivesuoji vai ii sáhkkohala.
– Mii sávvat ahte beassážiid áigge dán jagi eai dáhpáhuva lihkohisvuođat jus várálaš báikkiin vudjet, ja sávvat olbmuide buori ja oadjebas beassážiid, loahpaha Øvregård.
Iskkademiid čađahit ovttas Stáda Luonddubearráigeahčuin ja Meahccebálvalusain.
