Politidirektoráhtta lea mearridan ahte politiijat Norggas galget leat vearjoduvvon gaskkal suoidnemánu 19. ja 23. beivviid. Dát nationála mearrádus galgá nannet sihkkarvuođadovddu buot plánejuvvon doaluin mat lágiduvvojit dán áigodagas.
Dán jagi lea logi jagi áigi go Norga vásihii terrorfalleheami suoidnemánu 22. beaivvi 2011. Dán geažil galgá vearjudeapmi oadjudit stuorát álbmotčoahkkanemiid nugo isláma allabasi Id al-adha, čalmmustemiid ja doaluid suoidnemánu 22.beaivvi čalmmusteami oktavuođas.
– Čalmmusteamit dáhpáhuvvet miehtá riikka, ja lea mearriduvvon nannet politiijaid gearggusvuođa dáid beivviid, dadjá sekšuvdnajođiheaddji Jørn Schjelderup Politidirektoráhtta preassadieđáhusas.
Ii leat konkrehta áitta mii lea sivvan vearjudeapmái. Politiijaid sihkarvuođabálvalus árvvoštallá ahte terroráitta Norggas lea ain «muttát».
