-Almmuhus-
-Almmuhus-
-Almmuhus-
OĐĐASATPolitiijat eai leat sivalaččat

Politiijat eai leat sivalaččat

-

-

Finnmárkku politiijaguovlu bivddii Politiijaáššiid Erenoamášovttadaga guorahallat movt politiijaguovlu lea gieđahallan ášši ja gulahallan 37-jahkásaš nissoniin ja su bártnážiin, geat gottáhalaiga borgemánu 19. beaivvi Girkonjárggas.

Goddináššis bođii kritihkka politiijaid vuostá, ja jerrui leat go politiijat gieđahallan ášši rievttes ládje, ja ledje go politiijat galgan eará ládje ipmirdit dili ja álggahit doaimmaid suddjen dihte nissona ja su bártnáža.

Politiijaguovlu bivddii Erenoamášovttadaga sierra guorahallat ášši.

 

Ášši heaittihuvvui

Politiijaáššiid Erenoamášovttadat lea guorahallan ášši, eai ge leat gávdnan duođaštusaid ahte politiijabargit ja politiijaguovlu leat bargan rihkolaš dagu go leat gieđahallan ášši mas nisu lei váldán oktavuođa politiijain.

Ášši lea heaittihuvvon go eai leat duođaštusat ahte lei rihkkosášši.

 

Váldet oahpu áššis

Politiijameašttir Ellen Katrine Hætta lohká dehálažžan politiijaide ja servvodahkii ahte lea bealátkeahtes guorahallan politiija barggus, ja lea ilus go guorahallan lea čađahuvvon.

– Guokte olbmo gottáhalaige, ja juohke bálvalusbargi ja etáhta jearrá alddis lea go juoga maid livčče sáhttán bargat eará ládje, vai dakkár áššit eai dáhpáhuva. Munnje lea geahpádus go Erenoamášovttadat mearridii áššehuhttit, ja go ášši lea vuđolaččat guorahallojuvvon. Mii áigut geahčadit ášši ovttas bargiiguin ja geahččalit váldit oahpu das. Doppe lea álo juoga mas oahppá, rutiinnat ja gieđahallamat maid sáhttá buoridit, vaikko álo ii nagot hehttet dákkár surgadis dáhpáhusaid, lohká Hætta preassadieđáhusas.

-Almmuhus-