Finnmárkku politiijaguovlu duođašta dál ahte rumašbázahusat mat gávdnojedje Báhčaveajis mannan bearjadaga, gullet Kaisa Beddarii. Son dieđihuvvui jávkan 2013:s.
Bázahusat gávdnojedje Báhčaveajis čakčamánu 22. beaivvi, ja dál duođaštit politiijat ahte dat gullet Kaisa Beddarii (85), guhte dieđihuvvui jávkan 2013:s.
Spiralgoanstalahtuin identifiserejedje
– Bázahusaid searvvis lei maiddái spiralgoanstalahttu, mii našuvnnalaš registera mielde gullá Kaisa Beddarii, ja dan vuođul lea identifiseren dahkkon. Dát heive maid daid dieđuide mat politiijain ledje Kaisa birra, čállá Girkonjárgga politiijastašuvnna regiovdnajođiheaddji Hans Møllebakken preassadieđáhusastis.
Jotket ohcamiid
Finnmárkku politiijat jotket ain dutkamid ja ohcamiid dan guovllus gos bázahusat gávdnojedje, gávdnan dihte eambbo bázahusaid dahje eará diŋggaid mat sáhttet geažuhit mii lea dáhpáhuvvan.
– Buot mat gávdnojit sáddejuvvojit ID-iskosiidda mat leat čadnon DNA:i, go de geargat guovllus, čállá Møllebakken.
