Politiijat áigot dál viidát ovttasbargat eará ásahusaiguin dutkat ja hehttet eambbo seksuála illástemiid Divttasvuonas.
Politiijat áigot dál viidát ovttasbargat eará ásahusaiguin dutkat ja hehttet eambbo seksuála illástemiid Divttasvuonas.
Dán leat sii mearridan maŋŋel go riikkaaviisa VG almmuhii muitalusaid seksuála illástemiid birra Divttasvuonas mat leat dáhpáhuvvan guhkit áiggi badjel.
Aviisii muitaledje nissonat ja dievddut, buohkat julevsápmelaččat, oktiibuot 47 muitalusa seksuála illásteami birra maid sii leat vásihan mánnán dahje nuorran maŋemus golmmalot jagis.
Dat leat buktán garra reakšuvnnaid.
Searválaga eará ásahusaguin
Politiijat eai loga alddiineaset dieđuid man viidát dát vearredagut leat dáhpáhuvvan, go olbmot galget leat čiegadan dieđuid earret eará vearredahkkiid, gili dahje læstadiana searvegotti dihte.
Muhto dál dáhttu politijameasttir Tone Vangen Nordlánddas dutkat áššiid.
– Mii fertet gávnnahit mii lea dáhpáhuvvan, ja searválaga suohkaniin ja eará veahkkeásahusaiguin eastadit dákkár dáhpáhusaid fas geavvamis, čállá Vangen mediaásahusaide bearjadat iđida.
Luohttámuša hukset
Vangen lohká olbmuid oažžut leat sihkkarat ahte sii čuovvolit áššiid mat leat boahtán albmosii Divttasvuonas.
Sin deháleamos bargun lohká son eastadit eanet seksuála illástemiid, muhto sii áigot bidjat buot návccaid gávnnahit mii lea dáhpáhuvvan áššiin mat juo leat boahtán ovdan.
– Min bargu dás ovddasguvlui lea maid čájehit álbmogii ahte midjiide sáhttá luohttit, čállá Vangen.
Rahpat boares áššiid
Politiijameasttir ávžžuha buohkaid geain ležžet ođđa dieđuid boares áššiide, sidjiide daid buktit. Son muittuha ahte leat ođđa njuolggadusat dasa mii guoská boarásnuvvan áššiide.
Sii rahpet boares áššiid jus bohtet ođđa áššáigullevaš dieđut. Muhto son lohká ipmirdit jus Divttasvuona álbmogis ii leat luohttámuš politiijaide:
– Mu mielas lea dehálaš deattuhit ahte Nordlándda politiijat čohkkejit dál návccaid, ja mii čohkket alimus gelbbolašvuođa olles politiijaguovllus geat galget dustet daid hástalusaid mat mis dál leat Divttasvuonas. Earret politiguovllu, sáhttet maiddái Kriposis viežžat gelbbolaš olbmuid dán bargui, čállá son preassadieđáhusas NTB:ii.
