Sis-Finnmárkku Diggegoddi cealká kriminalitehta boazodoalus lea dehálaš almmustahttit ja cuiggoda duomus politiijaid ovttageardánis dutkama áššis mas guokte dievddu áššehuvaiga dán vahkus.
Sis-Finnmárkku Diggegoddi cealká kriminalitehta boazodoalus lea dehálaš almmustahttit ja cuiggoda duomus politiijaid ovttageardánis dutkama áššis mas guokte dievddu áššehuvaiga dán vahkus.
Dan vahkus áššehuhtii Sis-Finnmárkku diggegoddi guokte boazodoalli, 28- ja 33-jahkásačča, geat leigga áššáskuhtton rievdadan mearkkaid, verrošan boraspirebuhtadusaiguin ja biinnidan bohccuid muhtinlágán reaidduin.
–Ii sáhte ložžet gáibádusaid
Sis-Finnmárkku diggegoddi cealká duomus ahte kriminalitehta boazodoalus lea dehálaš almmustahttit, erenoamážit go dákkár kriminalitehtas leamaš guhkkit áigge jo dávjá soahpatmeahttunvuohta. Dat fas čuohcá beliid bargobirrasii.
– Dat ii goitge sáhte mearkkašit ahte ložžejit gáibádusaid dutkamis ja ášši duođaštusaiguin, čállá diggi duomus.
Šállošáhtti
Sis-Finnmárkku diggegoddi cealkáge duomus ahte lea šállošahtti go politiijat eai leat viidábut dutkan ášši.
– Ášši bealálaččaide, erenoamáš gillájeddjiid ektui, de lea šállošahtti go ii leat dahkkon viidát dutkan áššis, nu movt rihkkosbáikeiskosiid, erenoamážit áššis mas leat eará boazoeaiggádat seamma geasseorohagas.
– Dego ovdagihtii mearridan
Boarrásat dievddu advokáhta Hjallis Bakke iige leat duhtavaš politiijadutkamiin ja lea čađat oaivvildan ahte áššáskuhttieiseválddis eai lean doarvái buorit duođaštusat su áššehasa vuostá. Son lohká duomus cuiggoda diggegoddi boazopolitiijaid barggu, go leat dutkan beare ovttageardánin.
– Áššis leat ollu ja doallevaš duođaštusat, muhto eai mu áššehasa vuostá ja politiijat leat dutkán dainna lágiin ahte leat dego ovdagihtii mearridan ahte mu áššehas lea sivalaš. Sii eai leat dutkan gávnnahit gii lea sivalaš, ja eai leat dutkamis doallan rabas vejolašvuođa ahte earát sáhttet sivalaččat, lohká Bakke.
(Ášši joatká gová vuolábealde)
Ii kommentere
Dat leat boazopolitiijat geat leat dutkan ášši, muhto jođiheaddji Inger Anita Øvregård ii áiggo kommenteret ášši, ja čujuha áktorii áššis.
– Eat áiggo dadjat dál vuos maidege, ovdalgo lea mearriduvvon šaddágo ášši riektefámolaš dahje guoddaluvvo go.
(Ášši joatká gová vuolábealde)
Guovtti vahku geahčen
Áktor áššis, politiijaadvokáhtta Økokrimas Hans Tore Høviskeland lohká sii eai áiggo kommenteret eaŋkilosiid duomus, ja iige loga sáhttit lohkat maidege, ovdal maŋŋel guoddalanáigemearri lea vássán guovtti vahku geahčen.
