Várggáid politiijat báhče vuossárgga čuovganeamis albmá juolgái maŋŋel go cahkkehii biilla politiijavistti olggobealde ja bođii politiijai guvlui čuggestatvearjjuin.
– Áittadilálašvuohta badjánii go almmái vujii politiijaid garášauvssa njeaiga Várggáid politiijavisttis, cahkkehii biilla man siste čohkkái ja bođii politiijaid guvlui čuggestatvearjjuin. Politiijat vigge njálmmálaččat bissehit su, muhto son ii bisánan vaikko báhče várrehusluođa. Politiijat oidne dárbbu báhčit albmá juolgái, dadjá Finnmárkku politiijaguovllu taktihkalaš dutkama jođiheaddji Torstein Pettersen preassadieđáhusas.
Politiijat ožžo álggos dieđu diibmu 02:33 dan oktavuođas go badjelaš 50-jahkásaš almmái geahččalii cahkkehit stobu gos ledje eambbo olbmot. Almmái báhtarii báikkis.
Almmái lea dolvojuvvon Girkonjárgga buohccevissui luođđavahágiid dikšumii. Politiijaid dieđuid mielde ii leat heaggaváralaččat hávváduvvon.
Golbma olbmo besse olggos stobus mii cahkkehuvvui, eaige leat hávváduvvon. Dolla čáskaduvvui ovttatmano.
Politiijat leat álggahan dutkama. Almmái lea dovddus politiijaide ja sus lea galledangielddus ovtta olbmui gii lei stobus.
