Politiiját eai leat dušše bahádahkkit ohcame, sis lea maid váibmoláđisvuohta.
Iđđesija, birrasiid njealji ja viđa áigge, ožžo politiijat dieđu ahte lea olmmoš gii vázzá luoddaráigge Hesseng nammasaš báikkis Mátta-Várjjagis, ja orru galbmon.
Politiijat vudje báikái ja gávdne olbmo luoddaráigge vázzime, issorasat galbmon. Sii dolvo dievddu ruoktot de.
– Lei oalle galmmas dalle, lahka 20 buolašceahki, ja dievddus lei guhki vel ruoktot, muitala Finnmárkku politiijaguovllu operašuvdnajođiheaddji, Eirik Pedersen.
Gos lei vuolgán ja man guhki lei sus vel ruoktot?
– Mii eat dieđe gos son lei vuolgán, muhto sus lei gal ain 3 kilomehtera ruoktot das gos mii su biilii válddiimet, muitala Pedersen.
Muđui dáhpáhusat
Álttás:
Politiijat šadde vuoddját ovtta vissui gos ledje doarrán. Ovtta olbmos varddi ámadadju. Politiijat eai dieđe mii lea dáhpáhuvvan, muhto válde mielde ovtta 50-jahkásaš dievddu ja cogge giddagassii čielgadallat.
Olgobáikkis fas guokte dievddu leaba geahččaladdan fámuid ovtta nieidda dihte.
16-jahkásaš luntta bissehalai ja gávnnahalai vuodjimen fievrruin masa sus ii lean vuodjingoarta. Politiiját dolvo su ruoktot, ja galget ságastallat lunttain ja váhnemiiguin, ja sii maid váidet dan vuodjima rihkusáššin.
Gilevuonas fas lei olgoriika biila gopmánan. Ii leat oktage roasmmuhuvvan lihkohisvuođas.
Davvesiiddas fas lea muhtun vuodján biillain čađa áiddi, girkogárddi bokte. Vuoddji ii lean šat biilla luhtte go politiijat bohte dohko.
Girkonjárggas galga fas goalmmátlotjahkasaš dievdu muosehuhtten. Son ii muitalan politiijáide iežas nama ii ge maidege. Daid ovddas bidje su giddagassii čielgat.
