Finnmárkku politiijat leat ferten bissehit olu feasttaid priváhta čujuhusain mannan ija.
Álttá politiijat ožžo dii. 19:51 dieđu ahte 15-16-jahkásaččat ledje gárremiin Álttá guovddážis. Politiijat fitne guovllus. Diimmu maŋŋel, dii. 21:03, fitne politiijat Bossegohpi girkogárddis, gos lea gárren dievdu. Politiijat dáhtto dievddu guođđit báikki.
Dii. 23:43 dieđihuvvui biila suoláduvvon Amfis Álttás. Alit Mazda 6. Politiijat čuovvolit ášši.
Maŋŋel golmma álge feastariejat. Dii. 03:15 bođii vuosttaš diehtu Bossegohpis. Politiijat fitne priváhta čujuhusas, gos viessoeaiggát dáhtto vuolidit musihka. Diimmu maŋŋel fitne eará priváhta čujuhusas, gos bissehedje feastta.
Dii. 05:54 válde politiijat gitta guokte olbmo geaid navdet geavahan ja vurkkodan narkotihka. Dii. 06:18 bissehedje politiijat mopedavuoddji gii váldui vuodjimis gárrenoaivvis.
Girkonjárgga politiijat loahpahedje muhtun feastta dii. 00:56, ja dáhtto jáddadit musihka.
Suoidneleavššis lei UP dárkkisteame johtolaga. Dii. 21:59 mihtideddje leahtu nuorra biilavuoddjis. Sus lei 137 km/dii 90 sonas, ja massii koartta guokte vahkku maŋŋel go lei ožžon biilakoartta. Dii. 23:52 bissehedje biilavuoddji geas lei 146 km/dii 90 sonas. Son maid massii biilakoartta.
Hámmárfeasta politiijat ožžo dieđu dii. 00:28 feastarieja birra priváhta čujuhusas. Politiijat sihte vuolidit musihka. Dii. 01:10 lea feastariedja olggobealde ovtta priváhta čujuhusa. Politiijat fitne báikkis ja sihte sirdit feastta vissui.
Dii. 02:56 biddjui dievdu olggos olgobáikkis, go galgá áitan vávtta. Diimmu maŋŋel bođii fas diehtu rieja birra. Dii. 03:55 fitne politiijat priváhta čujuhusas, gos párra lea dikkáskan. Politiijat dáhtto sudno vuolidit jietnageavaheami.
Báhcavuonas bissehedje poltiijat doarruma guovtti dievddu gaskka. Nuppis varddii njunni.
