Mannan ija ledje Girkonjárgga politiijat bargame ohcanakšuvnnas, ii ge lean kapasitehta bissehit feastariejaid.
Nuorat ledje priváhta viesus doallame feasta lávvordat eahkeda go šattai rigearra feastas ja politiijat ožžo dieđu rigeara birra. Politiijat adde njálmmálaš dieđu heaittihit feasta ja váhnemat ožžo maid dieđu dáhpáhusa birra.
Diibmu 01.50 dieđihii muhtin olgobáiki guossi birra gii lei gárrenoaivvis ja láhttii unohasat. Politiijain ii lean vejolašvuohta čoavdit ášši go ledje bargame ohcanakšuvnnas.
Diibmu 02.22 doarrájedje guokte olgoriikkalaš joavkku Girkonjárgga guovddášbáikkis. Politiijain ii lean vejolašvuohta čoavdit ášši go ledje bargame ohcanakšuvnnas.
Diibmu 02.57 bođii diehtu muhtin olbmo birra Girkonjárgga guovddážis gii lei nu juhkaluvvon ahte ii sáhttán váldit vára alddis. Politiijain ii lean vejolašvuohta čoavdit ášši go ledje bargame ohcanakšuvnnas.
Diibmu 03.23 bođii diehtu rieja birra priváhta báikkis Girkonjárgga guovddážis, muhto politiijain ii lean vejolašvuohta čoavdit ášši go ledje bargame ohcanakšuvnnas.
Dán dieđihit Nuorta-Finnmárkku politiijat Twitteris.
