Teakstadieđus rávven mo boazodoalli galgá čilget dáhpáhusa politiijaide.
Teakstadieđus rávven mo boazodoalli galgá čilget dáhpáhusa politiijaide.
Namdalena politiijabálvá lea Frostating Lágamánnerievttis dubmejuvvon 45 beaivái giddagassii go lea hehtten riekteeiseválddi.
Namdal diggegoddi áššehuhtii politiijabálvvá árabut dán jagi, muhto Politiijaáššiid Spesiálaovttadat guoddalii áššehuhttima. Dan dieđiha Trønder-Avisa.
– Rávvii movt čilget
Golggotmánu 2016 báhččui ráfáiduvvon gumpe boazodoalloguovllus Liernes. Báhčči lei helikopteris.
Báhčči, geas lea gullevašvuohta boazodollui, oaččui guokte teakstadieđu politiijabálvvás ija ovdal go galggai gažadeapmái politiijaid lusa. Spesiálaovttadat dulkui teakstadieđuid dainna lágiin ahte politiijabálvá rávvii báhčči movt galgá čilget vai ii dubmehala.
Eanetlohku Frostating lágamánnerievttis oaivvildit ahte politiijabálvá lea rihkkon ráŋggáštuslága 157. paragráfa, mii guoskkaha riekteeiseválddiid vuostábargama.
Go ášši lei diggegottis, de čuoččuhii áktor dubmet su 75 beaivái giddagasii. (©NTB)
