Njeallje nuorra albmá leat váldon gitta Guovdageainnus, balahuvvet rihkkon bissolága.
Politiijat balahit nuorra albmáid rihkkon bissolága ja ráŋggáštuslága §189 c. čuoggá.
– Mii válddiimet sin gitta dramatihka haga. Ii okta ge leat báhčán ii ge roasmmehuvvan, dadjá politiijaid operašuvdnajođiheaddji Bjørn Tormod Syversen Ávvirii.
Finnmárkku politiijat dieđihedje dáhpáhusa birra Twitteris diibmu 13.06, muhto Ávvira dieđuid mielde dáhpáhuvai dát birrasii 12.30 áigge disdaga.
Politiijaid operašuvdnajođiheaddji Jannicke Silseth Eide muitala iFinnmark:i ahte politiijat reagerejedje go ožžo dieđu muhtin biillas leat áicon vearjjut.
Ii albma bissu
Albmát geat leat váldon gitta, orrot iešguđet báikkiin Finnmárkkus, ja eai leat buohkat Norgga stáhtaborgárat.
Buohkat leat goalmmátlot-jahkásaččat.
Politiijat muitalit ahte sii válde olbmuid gitta áicamiid geažil, ja ahte čájehuvvo ahte bissu mii albmáin lei ii lean albma bissu, muhto kopiija.
– Mii leat ovdagihtii áican, ja dál leat váldán gitta sin go balahit sin rihkkon bissolága ja ráŋggáštuslága. Ii lean albma bissu, muhto dakkár mainna ii sáhte báhčit, muhto mii buktá balu sidjiide geat oidnet dan, dadjá Syversen.
Ii oktage dán njealljásis leat vel áššáiduhtton áššis.
Ráhkadit ášši
Politiijaid operašuvdnajođiheaddji Jannicke Silseth Eide muitala iFinnmark:i ahte politiijat eai dieđe lea go dáhpáhus buktán balu.
– Mii eat leat gažadan vihtaniid vuos. Go ságastallat singuin geat ledje biillas, de ásahat ášši das go leamaš vearjosullasaš ávdnasat almmolaš sajiin, muitala Eide.
Váidon lobiheamet vuoddján
iFinnmark maid čállá okta dain njealljii albmás lea váidon go lea rihkkon ráŋggáštuslága, Eide dieđuid mielde.
– Sus lei replikavearju biillas almmolaš sajis. Son maid váido go lea diktán eará olbmo vuodjit su biillain vaikke albmás ii lean vuodjinkoarta, muitala Eide.
Almmái guhte vujii váido go lei vuodján lobiheamet.
